CQO-da bıyl 4 zamanaýı sút fermasy paıdalanýǵa berilmek
PETROPAVL. QazAqparat - Soltústik Qazaqstan oblysynyń tórt aýdanynda bıyl zamanaýı taýarly-sút ferma paıdalanýǵa berilmek. Nátıjesinde taǵy 60 adam turaqty jumyspen qamtylady, dep habarlaıdy QazAqparat tilshisi.
Elbasy N.Á.Nazarbaev 2018 jyly 5-qazanda Qazaqstan halqyna arnaǵan Joldaýynda «Negizgi mindet - eńbek ónimdiligin jáne qaıta óńdelgen aýyl sharýashylyǵy óniminiń eksportyn 2022 jylǵa qaraı 2,5 ese kóbeıtý kerek», - dedi.
Agrarly aımaq, SQO úshin bul - eń basty baǵyttardyń biri bolyp otyr. Aýyl sharýashylyǵyn damytýdyń arqasynda óńirdegi 700-ge jaqyn eldi mekenniń de jaǵdaıy jaqsarmaq.
SQO-da qazir sút óndirýmen 80 sharýashylyq aınalyssa, sonyń 16-sy zamanaýı tehnologııamen jumys isteıdi. Solardyń biri byltyr jeltoqsan aıynda Qyzyljar aýdanynyń Trýdovoe eldi mekeninde ashyldy. «Zenchenko ı K» komandıttik seriktestiginiń taýarly-sút kesheni 600 iri qaraǵa shaqtalǵan.
Jobany júzege asyrýǵa seriktestik 500 mln teńge qarjy jumsady. Qazir munda 350 saýyn sıyr bar. Ár sıyrdan táýligine 25 lıtr sút alynady. Tolyq qýatynda jumys istegende jylyna 2 myń tonna sút óndiretin bolady. Qazir munda 25 adam turaqty jumyspen qamtylǵan.
Sıyr saýyny - tolyqtaı avtomattandyrylǵan. Nemis qondyrǵysy ár qara mal týraly, onyń qashan buzaýlaǵanyna deıin tolyq málimet beredi. Shıkizat tolyǵymen sharýashylyqtyń zaýytyna jiberiledi. «Zenchenko ı K» saýda belgisi Qazaqstanda ǵana emes, kórshi Reseıde de jaqsy tanys.
SQO-da búgingi tańda sút óndirisin kóbeıtý maqsaty tur. Óıtkeni tabıǵı ónimge suranys joǵary. Byltyr tek Reseı memleketine ǵana 18,7 myń tonnaǵa jýyq sút eksporttalsa, bıyl jyl basynan kórshi elge 900 tonnasy satylypty.
«Byltyr 555 myń tonna sút óndirildi. Onyń 246 myń tonnasy, ıaǵnı jartysyna jýyǵy sút óńdeıtin kásiporyndarǵa jetkizildi. Oblysta olardyń sany - 13. Qazir sút zaýyttaryn 90 paıyzǵa jergilikti shıkizatpen qamtyp otyrmyz», - deıdi SQO aýyl sharýashylyǵy basqarmasy basshysynyń orynbasary Talǵat Naýryzbaev.
SQO aýyl sharýashylyǵy basqarmasynyń málimetinshe, taýarly-sút fermalardyń bireýi jaqynda «Sháımerdenov» sharýa qojalyǵynda ashylmaq. Aqqaıyń aýdany Lenın aýylynda 400 iri qaraǵa arnalǵan fermanyń qurylysy byltyr bastaldy. Birer kúnde Avstrııadan sımmental tuqymdy 500-ge jaqyn qara mal ákelinbekshi. Al mamyr aıynda sharýashylyq qajetti qondyrǵy alýdy josparlap otyr.
Budan basqa bıyl Aqqaıyń, Taıynsha, Qyzyljar jáne Mamlıýt aýdandarynda taýarly-sút keshenderi paıdalanýǵa berilmek. Nátıjesinde taǵy 60 adam turaqty jumyspen qamtylady.
