CQO-da byltyr josparlanǵan, biraq iske asyrylmaǵan jobalar belgili boldy
PETROPAVL. KAZINFORM – Soltústik Qazaqstan oblysy Shal aqyn aýdanynyń alty aýylyna byltyr ýáde etilgen sý jetpedi.
Petropavlda «AMANAT» partııasynyń oblystyq jáne qalalyq máslıhattardaǵy fraktsııalarynyń birlesken otyrysy ótip, atqarylǵan jumys qorytyndylandy. Jıynda júzege aspaǵan jobalarǵa erekshe nazar aýdaryldy. Mysaly, byltyr josparlanǵan 6 sút-taýar fermanyń bireýi ınvestordyń qarjylyq qıyndyqtaryna baılanysty Aqjar aýdanynda iske qosylmady. Desek te, óńirde 17 ferma ashyldy. Bıyl 17 mlrd teńge qarjyǵa taǵy 12 sút-taýar fermalaryn salý josparlanǵan.
«Josparlanǵan 10 sporttyq nysannyń ishinen Ýálıhanov aýdanynda hokkeı korty salynbady. Oǵan merdigerdiń salǵyrttyǵy sebep. Ol boıynsha sot protsessteri júrip jatyr. Shal aqyn aýdanyndaǵy 6 aýyldy sýmen qamtamasyz etý jobasy sý tasqyny jáne qarjylandyrýdyń kesh túsýine baılanysty júzege aspady. Bıylsýmen qamtýǵa qatysty 60 jobany iske asyrýǵa 25 mlrd teńgeden astam qarajat qarastyrylǵan. Ýálıhanov aýdanynda 24 km joldy jóndeý jospary oryndalmady. Alaıda 2025 jylǵa óńirdegi 800 km avtojoldy qalpyna keltirýge 34,6 mlrd teńge bólinip otyr», - dedi SQO Ekonomıka jáne bıýdjettik josparlaý basqarmasy basshysynyń orynbasary Áıgerim Aıtjanova.
Sondaı-aq, otyrysta jastar men bızneske arnalǵan granttar jáne turǵyn úımen qamtamasyz etý josparynyń oryndalmaý sebepteri talqylandy. Máselen, «Dıplommen aýylǵa» baǵdarlamasyn byltyr josparlanǵan 240 mamannyń tek 136-sy ǵana paıdalanǵan.
Al «Aýyl amanaty» jobasy múldem qarjylandyrýsyz qaldy. Budan bólek, depýtattar qoǵamdyq kólik qozǵalysynyń shemalaryndaǵy ózgeristerdi jáne MÁMS aıasynda kórsetiletin medıtsınalyq qyzmetterdiń sapasyn qarastyrdy.
Buǵan deıin Petropavl ákimdigi tasqyn kezinde zardap shekkenderdi tamaqtandyrǵan kásipkerge 29 mln teńge qaryz bolǵanyn jazdyq.