CQO-da «Bastaý Bıznes» jobasynyń bıylǵy túlekteri 43 mln teńgege jýyq grant aldy
SQO kásipkerler palatasy baspasóz qyzmetiniń málimetinshe, kásipkerliktiń negizderin úıretetin «Bastaý Bıznes» jobasy boıynsha bıylǵy jyldyń alǵashqy túlekteri 42,6 mln teńge grant aldy. Kýrstan ótken 73 adam endi óz kásipterin ashpaq. Jalpy jyl basynan oblysta osy baǵdarlama arqyly 400 bıznes-joba qarjylandyryldy.
SQO kásipkerler palatasy qarjylaı emes qoldaý bóliminiń sarapshysy Ásel Samaratovanyń aıtýynsha, jyl basynan «Bastaý Bıznes» boıynsha 374 soltústikqazaqstandyq oqýdan ótti. Qazir taǵy 253 adam kásipkerliktiń negizderin úırenip jatyr.
«Karantındik shekteýlerge baılanysty bıyl da «Bastaý Bıznes» boıynsha kýrs «Atameken Academy» platformasynda onlaın ótip jatyr. 374 adamdy oqytyp shyǵarsaq, sonyń 73-i grant aldy. Taǵy 53 túlekke 214,9 mln teńge nesıe berildi. 24 mamyr kúni kýrsqa qabyldanǵan 253 adamǵa sabaq bastaldy.
Jalpy bıyl 750 adamdy oqytýdy josparlap otyrmyz», - deıdi Ásel Samaratova.
Kýrs 21 kúnge shaqtalǵan. Al ótkenderge sertıfıkat beriledi. Bul qujatpen joba túlegi 200 AEK mólsherinde grant nemese 6 % mólsherlememen nesıe ala alady.
«Byltyr 938 adam kýrstan ótse, solardyń jartysyna jýyǵy qarjylaı qoldaýǵa ıe boldy. Jalpy 4 jyldyń ishinde «Bastaý Bıznes» boıynsha 7050 adam kásipkerlik negizderin bildi. Nátıjesinde 1,6 myń jeke kásipkerlik quryldy. Olar 2,1 mlrd teńgeniń ónimin shyǵaryp, qyzmetin usyndy. Osy aralyqta 1725 adamǵa 2,3 mlrd teńgeniń granty men nesıesi berildi. Onyń 1,6 mlrd teńgesi ótken jylǵa tıesili», - deıdi SQO kásipkerler palatasynyń dırektory Arman Orazǵulov.
