CQO-da «Basta» kásipkerler forýmy ótti
Oblystyq Kásipkerler palatasy baspasóz qyzmetiniń málimetinshe, forýmǵa Petropavl men oblystyń jaqyn mańdaǵy aýdandarynyń jas kásipkerleri jáne isin jańa bastaǵan bıznesmender qatysty. Jıynnyń maqsaty – tájirıbe almasý. Forýmǵa qatysýshylarǵa óńirdiń tanymal kásipkerleri aqyl-keńesterin berip, ulttyq bıznes-jattyqtyrýshy Ǵanı Abadan trenıngter ótkizdi.
Forýmnyń «basta» dep atalýy beker emes. Tájirıbeli kásipkerler jastardy qıyndyqtan qoryqpaı óz bıznesin bastaýǵa shaqyrdy. Solardyń biri - Saıran Hamzın bızneske 20 jyl buryn kelgen eken. Bastapqyda maı satýdan bastaǵan ol básekelesteri paıda bolǵannan keıin basqa baǵytty ustanady. Qazir isi órge basqan bıznesmen. Al Aıtyqan Qalǵaeva otbasynyń berekesin ǵana kirgizip qoımaı, jeke kásibin de dóńgeletken jandardyń biri. Oblystyq kásipkerler palatasy janyndaǵy kásipker áıelder keńesiniń tóraıymy.
Forýmǵa qatysýshylardyń spıkerlerge suraǵy kóp boldy. Olar ásirese ulttyq bıznes-jattyqtyrýshy Ǵanı Abadannyń sózin uıyp tyńdady. «Atameken» UKP brend-ambassadory bul kúnderi Qazaqstannyń qalalaryn aralap, «Bastaý», «Jas kásipker» jobalarynyń túlekterimen kezdesip jatyr.
«Memlekettik baǵdarlamalar jaıynda maǵlumat berip, kásippen aınalysýǵa bolatyndyǵyn aıtý, aqparattyq kómek berý – meniń mindetim. Qazir bári múmkin, qoryqpaı isti bastap ketý qajet. Qoldan kelmeıtin is joq», - deıdi Ǵanı Abadan.
Kezdesýge kelgender múmkindikti paıdalanyp, saýaldaryna jaýap alýǵa tyrysty.
«Men aýylda fıtnes-jattyqtyrýshy bolyp isteımin. «Jas kásipker» baǵdarlamasy boıynsha kýrstan óttim. Іsiń órge basý úshin únemi izdeniste bolyp, bilimdi arttyrý qajettigin túsindim. Úsh saǵatymdy jumsaǵanyma ókinbeımin. Biz qonaqtardy tyńdap qana qoımaı, kókeıde júrgen suraqtarymyzdy qoıdyq», - deıdi isin jańadan bastaǵan kásipker Ásel Serikbaeva.
Petropavlda mundaı forým alǵash ret jazda ótti. Ol joly óńir jastaryna «Jas kásipker» biregeı jobasy usynylyp, tanystyryldy.
