CQO-da balalardyń sport sektsııalary tegin jumys isteıdi – Qumar Aqsaqalov
PETROPAVL. QazAqparat – Soltústik Qazaqstan oblysynda budan bylaı memlekettik tapsyrys aıasynda balalarǵa arnalǵan sport sektsııalary tegin jumys istemek, dep habarlaıdy QazAqparat tilshisi.
SQO ákimi Qumar Aqsaqalov jaǵymdy jańalyqpen Facebook áleýmettik jelisindegi jeke paraqshasynda bólisti.
Óńir basshysynyń aıtýynsha, SQO-da 27 sport mektebi bolsa, onda 13 myńnan astam bala oqyp jatyr. Sport ınfraqurylymy damyp keledi. Óńirde 3 myń sporttyq nysan bar.⠀
«Sońǵy bir jylda aýdan ortalyqtarynda 2 zamanaýı sporttyq-saýyqtyrý kesheni ashyldy. Taǵy 5 sport ortalyǵynyń qurylysy jalǵasyp jatyr. Ótken qysta aýdandarda 3 hokkeı korty qoldanysqa berildi. Jyl sońyna deıin taǵy 2 hokkeı keshenin ashamyz. Daryndy jas sportshylarymyz oqıtyn mektep-ınternat-kolledjge arnalǵan jataqhananyń qurylysy bastaldy.
Prezıdenttiń tapsyrmasy boıynsha sporttaǵy memlekettik tapsyrys jobasy júzege asyrylyp jatyr. Bul ata-analar men balalar úshin keremet jańalyq. Oblysta 3 myńnan astam bala qazir aqyly sport sektsııalaryna qatysady. Endi olardyń barlyǵy bul sektsııalarda tegin jattyǵatyn bolady», - dep jazdy Qumar Aqsaqalov.
