CQO-da 62 jastaǵy áıel alǵash ret Qazaqstan azamattyǵyn aldy

PETROPAVL. QazAqparat – Soltústik Qazaqstan oblysynda burynǵy keńestik tólqujatpen júrgen 62 jastaǵy áıel Qazaqstan azamattyǵyn aldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Aqqaıyń aýdanynyń týmasy 62 jastaǵy Raısa Pıven saýynshy bolyp jumys istegen.

Ýkraın azamatyna turmysqa shyǵyp, 1991 jyly Moldova Respýblıkasyna qonys aýdarady. Alaıda áıel kúıbeń tirlikpen eski qujatyn aýystyrmaı júrip qalady.

Byltyr qarasha aıynda Raısa Pıven ózin azamattyǵy joq tulǵa retinde tanýy úshin Moldova Respýblıkasynyń polıtsııasyna aryzdanǵan.

Alaıda sol eldiń zańyna baılanysty tártip saqshylary áıelge mártebe berýden bas tartyp, Qazaqstanǵa deportatsııalaıdy.

Áıeldiń Aqqaıyń aýdanynda jalǵyz týysy ǵana qalǵan eken. Ol sonyń úıine kelip qonystandy.

Jergilikti polıtsııa da shetelden kelgen zeınetkerdi jaqsy qabyldap, qoldan kelgenshe kómektesti.

«Mıgratsııa qyzmetkerleri mán-jaıdy tolyq anyqtap, onyń 1991 jylǵa deıin oblys aýmaǵynda turǵanyn naqtylady. Osylaısha Raısa Nasıbýlovna 1974 jylǵy qyzyl tólqujatynan qutylyp, 18 mamyr kúni QR azamatynyń jeke kýáligin aldy. Jaqynda ol óziniń alǵashqy zeınetaqysyn alady. Adamdardyń máselesin sheshýge kómektesý - ishki ister organdary quziretine kiredi. Polıtsııa «Halyq únine qulaq asatyn memleket» prıntsıpin iske asyrý aıasynda bul jumystarǵa basymdyq bergen», - deıdi Aqqaıyń aýdanynyń PB bastyǵy Rýslan Saparov.