CQO ákimi erekshe balalardyń úılerine baryp, merekemen quttyqtady
PETROPAVL. QazAqparat - Halyqaralyq balalardy qorǵaý kúni Soltústik Qazaqstan oblysynyń ákimi Qumar Aqsaqalov múmkindigi shekteýli balalardy úılerine baryp quttyqtady, dep habarlaıdy QazAqparat tilshisi.
SQO ákimi baspasóz qyzmetiniń málimetinshe, óńir basshysy Arýjan Hasetova men Sofıa Lýkıanchenkony meırammen quttyqtap, syılyqtar tabys etti.
Arýjan Hasetovanyń jasy 12-de. Jasóspirim Petropavldaǵy qazaq mektep-gımnazııasynda oqıdy.
Muǵalimderiniń aıtýynsha, Arýjan jaýapty ári aqyldy oqýshy. Kúndeliginde tek tórt pen bes qana. Bolashaqta sýretshi bolǵysy keledi eken. Oblys ákimi bilimge umtylǵan Arýjanǵa maqtaý aıtty.
«Arýjan, seni búgingi Halyqaralyq balalardy qorǵaý kúnimen quttyqtaýǵa keldim. Seniń jaqsy oqıtynyńdy bilemin. Óz aldyńa úlken maqsattar qoıyp otyrsyń. Úlken nátıjelerge qol jetkizesiń degen senimdemin», - dedi Qumar Aqsaqalov.
Óńir basshysy Sofıa Lýkıanchenkony da meırammen quttyqtady. Sofıa oblys ákimine óziniń sýretteri men týyndylaryn kórsetti. Bolashaqta ol dızaıner bolýdy armandaıdy.
«Sofıa, sen ózińe naqty maqsat qoıyp otyrsyń. Umtylyp jatsyń, jaraısyń. Erekshe balalardyń mádenıet jáne sport salalarynda bıik belesterdi baǵyndyrǵan mysaldary kóp. Tipti AQSh prezıdenti Franklın Rýzvelt te eldi otyryp basqarǵan. Seniń maqsatyń aıqyn - dızaıner bolý. Armanyńa jet», - dedi Qumar Aqsaqalov.
Erekshe balalarǵa árdaıym qamqorlyq qajet. Qumar Aqsaqalov budan bylaı múmkindigi shekteýli balalarǵa qala boıynsha saıahat uıymdastyryp turmaq. Oblys ákimi Arýjan men Sofıany zamanaýı oqýshylar saraıyn aralaýǵa shaqyrdy.
