Cirque du Soleil pandemııaǵa baılanysty bankrotqa ushyrady
MONREALЬ. QazAqparat – Biregeı tsırk shoýymen búkil álemge tanymal Cirque du Soleil bankrotqa ushyraǵanyn jarııalady. Bul týraly Cirque du Soleil Entertainment Group kompanııasynyń resmı saıtynda jazyldy, dep habarlaıdy QazAqparat.
Bas keńsesi Kanadanyń Monreal qalasynda ornalasqan tsırk 1 mlrd AQSh dollarynan asatyn qaryzyn jaba almaı otyr. «Sońǵy aılarda koronavırýs pandemııasyna baılanysty tsırktiń barlyq shoýlary jabylyp, eshqandaı tabys túspedi», - deıdi Cirque du Soleil Entertainment Group basshysy Danıel Lamarr.
CNN málimetinshe , kompanııa basshylyǵy sońǵy 36 jyl boıy jumys istep kele jatqan tsırk pen onyń qyzmetkerleriniń bolashaǵyn saqtap qalý úshin baryn salyp jatyr. Tsırk jabylyp qalmaý úshin qyzmetkerlerdiń 95% nemese 3,5 myń adam jumystan bosatylmaq. Qysqartylǵan qyzmetkerlerdi qoldaý úshin 15 mln dollar bólinedi. Kompanııanyń málimdeýinshe, qysqartý – ýaqytsha shara. Tsırk shoýlar men gastroldik saparlardy bastaǵannan keıin olardyń basym bóligi qaıta jumysqa qabyldanady. Sondaı-aq, kompanııa daıyndalǵan bıznes-josparǵa sáıkes qaıta qurylymdaýǵa 300 mıllıon salýdy josparlap otyr.
