Tsıklon Qazaqstannyń ońtústigine jaýyn-shashyn, jel, tuman ákeledi - 17 aqpanǵa arnalǵan aýa raıy boljamy
ASTANA. 16 aqpan. QazAqparat - Qazaqstan aýmaǵynyń soltústik jartysy 17 aqpan kúni kólemdi antıtsıklonnyń yqpalynda bolady, dep habarlaıdy TJM-niń baspasóz qyzmeti Qazgıdrometke silteme jasap.
Kaspııdiń ońtústiginen respýblıkanyń ońtústik jartysyna tsıklon jyljyp kele jatyr. Onymen baılanysty atmosferalyq aǵymdar bul jerde jaýyn-shashyn túsip, jeldiń kúsheıýine ákelip soqtyrady. Jekelegen aýdandarda tuman bolady, dep naqtylaıdy sınoptıkter.
Mańǵystaý, Atyraý, Batys Qazaqstan, Aqtóbe, Shyǵys Qazaqstan oblystarynda keıbir jerlerde jeldiń sekýndyna 15-20 metrge deıin kúsheıýi kútilýde.
Jambyl oblysynyń keıbir jerlerinde jeldiń jyldamdyǵy sekýndyna 15-20 metrge deıin jetip, tuman, kóktaıǵaq bolmaq.
Kúndiz Ońtústik Qazaqstan, Qyzylorda oblystarynda - keıbir jerlerde jeldiń jyldamdyǵy sekýndyna 15-20 metrge deıin kúsheıedi.
Almaty oblysynda keıbir jerlerde tuman túsedi, Jalańashkól stansasy aýdanynda - ońtústik-shyǵystan sekýndyna 17-22 metrge deıin ekpinde jel soǵyp, onyń jyldamdyǵy sekýndyna 27 metrge deıin jetedi.
Jaqyn táýlikterde Ońtústik Qazaqstan, Qyzylorda, Jambyl, Almaty jáne Shyǵys Qazaqstan oblystarynyń ózenderinde muz qubylystaryna baılanysty sý deńgeıleriniń aýytqýlary baıqalady. Jekelegen ózenderde sý deńgeıleri kóterilýi múmkin. Shardara sý qoımasyna 17-18 aqpan kúnderi 1420-1430 m3/s shamasynda sý quıylýy múmkin.
