Tsıklon Qazaqstannyń batysyna jaýyn-shashyn, tuman, kóktaıǵaq ákeledi - 1 naýryzǵa arnalǵan aýa raıy boljamy
ASTANA. 29 aqpan. QazAqparat - Qazaqstan aýmaǵynyń kóptegen bóligi 1 naýryz kúni tumandy jaýyn-shashynsyz aýa raıy kútiletin antıtsıklon taramdarynda ornalasady.
Respýblıkanyń batysynda tsıklon óz áserin saqtap, mundaǵy keıbir jerlerde jaýyn-shashyn, tuman, kóktaıǵaq bolady dep kútilýde, dep habarlaıdy Qazgıdrometke silteme jasaǵan TJM-niń baspasóz qyzmeti.
Aqmola, Qostanaı, Soltústik Qazaqstan, Pavlodar, Ońtústik Qazaqstan oblystarynyń keıbir jerlerinde tuman túsýi kútiledi.
Jambyl, Qyzylorda oblystarynda keıbir jerlerde - tuman túsip, jeldiń ekpini sekýndyna 15-22 metrge deıin kúsheıedi.
Aqtóbe, Qaraǵandy oblystarynda kúndiz jeldiń sekýndyna 15-20 metrge deıin kúsheıýi, Qaraǵandy oblysynda - keıbir jerlerde tuman túsýi kútilýde.
Batys Qazaqstan, Atyraý, Mańǵystaý oblystarynyń keıbir jerlerinde tuman, kóktaıǵaq bolady, jeldiń sekýndyna 15-20 metrge deıin kúsheıýi saqtalady, Batys Qazaqstan oblysynda onymen qosa burqasyn turady.
Shyǵys Qazaqstan oblysynda - keıbir jerlerde jaıaý burqasyn, jeldiń sekýndyna 15-20 metrge deıin kúsheıýi kútiledi.
Jaqyn táýlikterde Syrdarııa ózeninde (Qyzylorda oblysynyń ońtústiginde), Jambyl jáne Almaty oblystaryndaǵy tómengi taýly aımaqtardyń jekelegen ózenderinde muz qubylystarynyń álsireýi baqylanady. Arys ózenindegi «Arys» gıdroqurylǵysynan tómen jerlerde bolyp ótken tasqyn tolqynynyń taralýy esebinen sý deńgeıleriniń kóterilýi baıqalady. 1-3 naýryz kúnderi Shardara sý qoımasyna 1420-1450 tekshe metr kóleminde sý kelip túsedi. Jambyl, Almaty jáne Shyǵys Qazaqstan oblystarynyń jekelegen ózenderinde sý deńgeıleriniń aýytqýlary baıqalady.
