Tsıklon Qazaqstanǵa jaýyn-shashyn, burqasyn ákeledi, tuman jáne kóktaıǵaq bolady dep kútilýde - 4 qańtarǵa arnalǵan aýa raıy boljamy
ASTANA. 3 qańtar. QazAqparat - 4 qańtar kúni Qazaqstannyń basym bóligi tsıklonnyń yqpalynda bolady, onymen birge aýa raıynyń turaqsyz sıpaty kútiledi, jaýyn-shashyndar bolyp, keıbir jerlerde tuman túsedi, kóktaıǵaq, burqasyn, ekpindi jeldiń bolýy kútilýde.
Respýblıkanyń ońtústigi ǵana antıtsıklonnyń yqpalynda bolady, onymen birge jaýyn-shashynsyz aýa raıy kútilýde, dep habarlaıdy Qazgıdrometke silteme jasaǵan TJM-niń baspasóz qyzmetinen.
Almaty oblysynda keıbir jerlerde tuman túsip, Jalańashkóldiń aýdanynda 15-20 m/s jyldamdyqpen soǵatyn jel kútiledi, jel ekpini 25 m/s deıin jetedi.
Jambyl, Atyraý oblystarynyń keı jerlerinde tuman, kóktaıǵaq, 15-20 m/s deıin soǵatyn ekpindi jel kútilýde.
Ońtústik Qazaqstan, Aqtóbe oblystarynda keıbir jerlerde tuman túsip, jeldiń 15-20 m/s deıin soǵýy yqtımal.
Qyzylorda oblysynda túnde keıbir jerlerde jeldiń 15-20 m/s deıin soǵýy kútiledi.
Batys Qazaqstan oblysynyń jekelegen aýdandarynda, kúndiz Mańǵystaý oblysynda tuman túsedi, Batys Qazaqstan oblysynyń keıbir jerlerinde kóktaıńaq bolýy yqtımal.
Aqmola, Qaraǵandy, Shyǵys Qazaqstan oblystarynda, túnde Pavlodar oblysynyń keıbir jerlerinde jel kúshi 15-20 m/s deıin kúsheıe túsedi, burqasyn bolýy múmkin.
Qostanaı oblysynyń keıbir jerlerinde túnde tuman túsedi, kúndiz jeldiń kúshi 15-20 m/s deıin jetýi múmkin, burqasyn bolady. Soltústik Qazaqstan oblysynyń keıbir jerlerinde burqasyn, tumannyń túsýi kútiledi.
Aldaǵy táýlikte Almaty oblysynyń jekelegen ózenderinde muz qatý qubylystary saldarynan sý deńgeıiniń aýytqýlary baıqalady.
Syrdarııa ózeniniń Ońtústik Qazaqstan oblysyndaǵy jáne Qyzylorda oblysynyń ońtústigindegi bóliginde Shardara sý qoımasynan sý aǵynynyń qysqarýyna baılanysty sý deńgeıiniń azaıýy kútilýde.
Qazaqstannyń qalǵan sý nysandarynda gıdrologııalyq rejımde aıtarlyqtaı ózgerister kútilmeýde.
