Tsıfrlyq úkimet salasyndaǵy ınnovatsııalar baıqaýynyń jeńimpazy anyqtaldy

ASTANA. QazAqparat - Astana memlekettik qyzmet haby jarııalaǵan tsıfrlyq úkimet salasyndaǵy ınnovatsııalar baıqaýynyń jeńimpazy jarııalandy. Aıta keteıik, konkýrs eń nátıjeli ınnovatsııalyq sheshimderdi anyqtaý jáne olardy aımaq elderi arasynda taratý maqsatynda jarııalanǵan bolatyn.

Habtyń baspasóz qyzmetinen habarlaǵandaı, konkýrs boıynsha «Blokcheın: elektrondyq úkimetke arnalǵan ınnovatsııalyq sheshim» jobasyn usynǵan IMD Dúnıejúzilik básekege qabilet ortalyǵy (Shveıtsarııa) jáne «E-Practicum: praktıkalyq bilimge arnalǵan onlaın-platforma» jobasyn usynǵan Digital Solutions Ltd.(Qazaqstan) jeńimpaz atandy.

Aıta keterligi, konkýrsqa 17 eldiń 46 ókili qatysty. Atap aıtqanda, AQSh, Ázerbaıjan, Bangladesh, Vengrııa, Egıpet, Zambııa, Qazaqstan, Qyrǵyzstan, Mońǵolııa, Ońtústik Afrıka Respýblıkasy, Reseı, Tájikstan, Ýkraına, Ulybrıtanııa, Chernogorııa jáne Shveıtsarııa. Bıylǵy konkýrstyń jeńimpazdaryn Estonııa, Birikken Ulttar Uıymynyń Damý Baǵdarlamasy jáne «Zerde» Ulttyq aqparattyq-kommýnıkatsııalyq holdınginiń ókilderinen turatyn Halyqaralyq baǵalaý komıssııasy anyqtady.

 «Qazirgi zamanǵy aqparattyq tehnologııalardy damytý memlekettik qyzmet úshin jańa múmkindikter, sonymen birge syn-tegeýrinder týǵyzady. Ashyq aqparattyq qoǵamda azamattar basqa elderdegi memlekettik organdardyń jumysynan habardar. Bul memlekettik organdar úshin kvazı-básekelestik ortany qalyptastyrady. Azamattardyń ósip kele jatqan úmitin qanaǵattandyrý úshin memlekettik organdar ınnovatsııalardy qoldanýy tıis. Baıqaýdyń maqsaty - memlekettik qyzmet salasyndaǵy eń ozyq ınnovatsııalyq sheshimderdi anyqtaý jáne olardy odan ári paıdalaný maqsatynda Habtyń qatysýshy elderi arasynda taratý», - deıdi Astana memlekettik qyzmet haby Basqarýshy komıtetiniń tóraǵasy Álıhan Baımenov.

Jeńimpazdarǵa ınnovatsııalyq sheshimderderdi júzege asyrý jóninde oqytý keısteri men ádistemelik nusqaýlardy ázirleý jáne olardy Astana habynyń qatysýshy elderi arasynda taratý úshin jaǵdaı jasalady.