Tsıfrlyq úkimet ofısi qaǵazbastylyqtan qalaı qutqarady

NUR-SULTAN. QazAqparat – QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın Tsıfrlyq úkimet ofısinde qandaı málimetter bazasy ıntegratsııalanatynyn túsindirdi. Bul týraly ol jelidegi paraqshasynda jazdy, dep habarlaıdy QazAqparat.

«Tsıfrlyq úkimet ofısindegi Sıtýatsııalyq ortalyq barlyq aqparattyq bazanyń deregin oqı alady jáne aımaqtardyń bárimen etene jumys istep, jaǵdaıdy nazarda ustaıdy. Nátıjesinde shynaıy aqparatqa jol ashylyp, qaǵazdaǵy jáne excel túrindegi esepter joıylady. Keıde kúdikti esepter men dálelsiz derekterdiń bolatyny jasyryn emes. Máselen, bıyl vaktsınalaý boıynsha osyndaı jaǵdaı boldy. Keıbir iri kásiporyndar men ákimdikterdiń esebindegi kórsetkishterdi biz túrli bazalardaǵy málimettermen salystyryp, saraptama jasaǵanymyzda, sandar sáıkes kelmeı, «basqa aqıqatty» anyqtadyq. Qazir biz eldegi vaktsınalaý úrdisiniń ósimi boıynsha derekterdi kóre alamyz», - dep jazdy mınıstr.

Vedomstvo basshysy Tsıfrlyq úkimet keńsesinde Sıtýatsııalyq ortalyqtan basqa ulttyq analıtıkalyq ortalyq, tsıfrlyq transformatsııa ortalyǵy jáne ulttyq jobalaý ofısi jumys isteıtinin aıtady.

«Ulttyq analıtıkalyq ortalyq matematıkalyq úlgileýdi qoldanyp, bazadaǵy korrelıatsııalardy izdestiredi, boljap, taldaý jasaıdy.

Al tsıfrlyq transformatsııa ortalyǵy haosty avtomattandyrýǵa tosqaýyl qoıady. Mysaly, buǵan deıin jeke turǵyn úı qurylysyna jer ýchaskesin alý úshin 11 qadam jasap, 88 kún kútý kerek bolsa, jańa úderis engizilgennen beri bul qyzmettiń nátıjesine 3 qadam jasap, 8 kúnde qol jetkizýge bolady.

Ulttyq jobalaý ofısi barlyq ulttyq jobalardy baqylap, qajet bolǵan jaǵdaıda túzetýler engizip, KPI oryndalmaı jatqandyǵy týraly eskertý jiberedi. Mysaly, ulttyq jobadaǵy 1000 mektep salý bastamasyn jobalyq turǵyda basqaratyn ortaq júıe bolady. Sol jerge jaýapty mamandar men organdar ózine qatysty derekterdi toltyryp otyrady. Biz qaǵazdaǵy esepter men hattardy joıǵymyz keledi. Endi júıe tender jarııalanǵannan bastap, barlyq jumystar barysyn qadaǵalap, táýekelderdi aldyn-ala anyqtaıdy», - deıdi Baǵdat Mýsın.

Eske salsaq, 6 qyrkúıek kúni QR Prezıdenti Qasym-Jomart Toqaev ulttyq analıtıkalyq jáne tsıfrlyq transformatsııa ortalyqtaryn, ulttyq jobalaý ofısin qamtıtyn Tsıfrlyq úkimet ofısiniń jumysyn bastaýǵa ruqsat berdi.