Tsıfrlyq tehnologııalardy terrorıstik maqsatta qoldanýdyń qaýpi qandaı

NUR-SULTAN. QazAqparat – Tsıfrlyq tehnologııalardy terrorıstik maqsatta qoldanýdyń qaýpi jaıly «Astana Club» otyrysynda reseılik PIR ortalyǵynyń tóraǵasy, general-leıtenant Evgenıı Býjınskıı pikir bildirdi, dep habarlaıdy QazAqparat tilshisi.

«Astana Club» saıası forýmy aıasynda ótken brıfıngte tilshiler osyndaı suraqty Evgenıı Býjınskııge qoıyp kórdi.

«Eger kıberqarý týraly aıtyp otyrǵan bolsańyzdar, bul ázirge beımálim óris. Sondyqtan oǵan jaqyndaýdyń ózi qıyn. Kıberqarýdyń qaýipti kúshi ıadrolyq qarýdan asyp ketýi múmkindeıtin kóptegen pikir bar. Biraq bul salany qalaı retteý kerektigin áli eshkim bilmeıdi. Óıtkeni ajyratý óte qıyn: terrorıster degen bul memleket pe, memlekettik emes uıymdardan turatyn top pa? Sondyqtan, eger kıberqarý terrorıstik maqsatta qoldanylsa, - ol, árıne, óte qorqynyshty jaǵdaı», - dedi Evgenıı Býjınskıı jýrnalısterdiń suraqtaryna jaýap bere otyryp.

Ol sondaı-aq «jasandy ıntellekt» sııaqty tsıfrlyq tehnologııaǵa da toqtaldy.

«Ol tsıfrlyq qarýlarǵa jaqyn. Zerttelmeı jatyr. Sondyqtan, bul áli ıgerilmegen keń dala sekildi. Lańkestik maqsatta paıdalanylsa, onyń zardaby aýyr bolýy múmkin», - dep tolyqtyrdy Evgenıı Býjınskıı.

Eske sala ketsek, Nur-Sultanda «Astana Club» saıası forýmynyń besinshi otyrysy ótip jatyr. Otyrys barysynda «Eýrazııa úshin 10 basty syn-qater» táýekelder reıtıngisiniń ekinshi basylymynyń tusaýy kesildi. Forým jumysyna 40-qa tarta álemdik bedeldi sarapshy men saıasatker qatysýda.