Tsıfrlyq tehnologııalar aýyl sharýashylyǵynyń damýyna qalaı serpin beredi

ASTANA. QazAqparat - «Zerde» ulttyq ınfokommýnıkatsııa holdıngi» AQ basqarma tóraǵasy Rýslan Eńsebaev AShM ǵımaratynda ótken keńeıtilgen alqa otyrysynda tsıfrlandyrýdyń aýyl sharýashylyǵy sektoryna ne beretinin aıtty, dep habarlaıdy «QazAqparat» HAA tilshisi.

«Ótken jyldyń jeltoqsanynda qabyldanǵan «Tsıfrlyq Qazaqstan» baǵdarlamasynda Aýyl sharýashylyǵy mınıstrligine qatysty tórt shara bar. Bul álbette, naqty egin sharýashylyǵyna júıeni engizý, mal sharýashylyǵy ónimderin baqylaý, elektrondy saýdany engizý men halyqaralyq logıstıkalyq jelilermen baılanys ornatý», - deıdi ol.

Holdıng tóraǵasynyń aıtýynsha, jalpy, aýyl sharýashylyǵyn tsıfrlandyrý baǵdarlamasy eńbek ónimdiligin 45 paıyzǵa deıin arttyrýdy, aýyl sharýashylyq ónimin 69 paıyzǵa deıin arttyrýdy kózdeıdi.

«Qazirgi kúnniń ózinde tsıfrlandyrý tehnologııalaryn Qazaqstanda tabysty túrde qoldanyp jatqan kásiporyndardyń barlyǵy qýantady. Dese de, jappaı qoldanyp jatqan kásiporyndar kóp emes. Álemde jaǵdaı bólekteý. Naqtyraq aıtqanda, Kanada fermerleriniń 84 paıyzy, AQSh-ta 80 paıyzy zamanaýı tsıfrlyq tehnologııalardy qoldanady. Egin sharýashylyǵynda tsıfrlyq tehnologııalardy qoldanýdyń arqasynda AQSh memleketi qant ónimdiligin 80 paıyzǵa, bıdaı ónimdiligi 42 paıyzǵa arttyrǵan», - deıdi Rýslan Eńsebaev.

Holdıng basshysynyń sózine sensek, tsıfrlyq tehnologııalardy qoldaný sonymen birge aýa raıynyń boljamyn bilip otyrýǵa, spýtnıktik málimetterdiń taldaýyn, egin shyǵymdylyǵynyń tarıhyn bilip otyrýǵa múmkindik beredi.