Tsıfrlyq tańbasy joq temeki ónimderi úshin aıyppul salynady
Qaǵaz aktsızdik markalardyń kúshi joıylýyna baılanysty bıylǵy 1 qańtardan bastap temeki ónimderi tek sáıkestendirý quraldarymen tańbalanatyny belgili.
Ákimshilik quqyq buzýshylyq týraly kodekstiń 283-babyna, ıaǵnı «aktsızdik markalar» termınin «sáıkestendirý quraldaryna» aýystyrý týraly ózgeris 13 shildeden bastap kúshine endi. Aıta ketsek, 11 shilde kúni Memleket basshysy «Qazaqstan Respýblıkasynyń Ákimshilik quqyq buzýshylyq týraly kodeksine ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıdy.
Qazaqstan Respýblıkasy Úkimetiniń qaýlysymen mindetti tańbalaýǵa jatatyn temeki ónimderi túrleriniń naqty tizbesi (sıgaretter, sıgarıllalar, sıgaralar, stıkter, kalıan temekisi jáne t.b.) bekitildi.
Qazaqstan Respýblıkasynyń zańnamasyna sáıkes, temeki ónimderiniń aınalymy sáıkestendirý quraldarymen ǵana múmkin bolady.
Sondaı-aq, Memlekettik kirister komıteti endi temeki ónimderiniń barlyq túrlerinde tsıfrlyq tańbalaýdyń (sáıkestendirý quraldarynyń) bolmaǵany úshin organdar tarapynan tárkilene otyryp, ákimshilik jaýapkershilikke tartylatynyn eske saldy.
Jyl basynan bastap el aýmaǵyna kontrabandalyq jolmen ákelinip, satylmaq bolǵan temeki ónimderiniń 22,5 mln qoraby anyqtalyp, tárkilengen. Máselen, Memlekettik kirister komıteti málim etkendeı, Qazaqstanǵa tańbalanbaǵan 4 mln qoraptan astam temekini kontrabandalyq jolmen ákelýge tyrysqandar anyqtaldy. Bul rette bıýdjetke tóleýge jatatyn kedendik tólemderdiń, salyqtardyń jáne aktsızdiń aldyn ala somasy – 1,2 mlrd teńge dep baǵalandy.
Foto: epha.org
