Tsıfrlyq kúz - 2018: Qazaqstandyqtar vırtýaldy kórme aralap, ınteraktıvti kontsertti tyńdaı alady
Frantsııanyń Qazaqstandaǵy Tótenshe jáne Ókiletti elshisi Fılıpp Martınenyń aıtýynsha, "Tsıfrlyq kúzdi" ótkizý kezinde Qazaqstannyń tsıfrlyq texnologııalarǵa qatysty qazirgi ustanymy barynsha eskeriledi. Osyǵan baılanysty sheteldiń ártisteri ınnovatsııalyq ádis-tásilderdi jan-jaqty qoldanatyn bolady. Al mádenı sharalardyń basym bóligi vırtýaldy túrde kórsetiledi. Máselen, Parıj qustaryna arnalǵan kórmede arnaıy qurylǵylar taratylady. Sony kıip alyp, Frantsııanyń astanasynda ushyp júretin qustarmen tanysýǵa bolady. Budan bólek, ınteraktıvti kontsert uıymdastyrylady. Onda shyǵarmalar mobıldi qosymshalar arqyly oryndalady. Al uıaly telefondy qozǵaý arqyly áýenderdi ózgertip otyrýǵa bolady.
"Bizde de "Tsıfrlyq Frantsııa" degen baǵdarlama bar. Sonyń aıasynda biz 2022 jylǵa deıin barlyq ákimshilik sharalardy elektrondy formatqa aýystyrýdy kózdeımiz. Al "Tsıfrlyq kúz" maýysymy kezinde biz osy saladaǵy tájirıbemen bólisemiz. Maýsym aıasynda biz ónerkásip, bilim men mádenıetti qamtýǵa tyrysamyz. Máselen, 25 qazan kúni Astanada ónerkásipti tsıfrlandyrýǵa arnalǵan úlken forým ótedi. Oǵan frantsýz kásiporyndarynyń ókilderi jáne bilikti sarapshylar keledi. Sol kezde jańa jobalar qolǵa alynady degen senim bar. Ekinshi baǵyt ol - bilim. Frantsııada tsıfrlyq bilim jaqsy damyǵan. Máselen, bizde anımatsııalyq fılmderge úıretetin 75 mektep bar. Ony kóp adam bile bermeıdi. Negizi, osy saladaǵy xalyqaralyq sarapshylardyń jartysyna jýyǵy - frantsýzdar. Úshinshi baǵyt - mádenıt boıynsha biraz sharalar vırtýaldy túrde kórsetiledi", - deıdi F.Martıne.
Jospar boıynsha "Tsıfrlyq kúz - 2018" maýsymy aıasynda Almatydaǵy sharalar 15 qazanda, al Astanadaǵy sharalar 25 qazanda bastalady. Maýsym bir aıǵa sozylady. Sharanyń uıymdastyrýshylary - QR Aqparat jáne kommýnıkatsııalar mınıstrligi, Qazaqstandaǵy Frantsııa elshiligi men Almaty qalasynyń ákimdigi.
