Tsıfrlyq komıssarlar jasaǵy qalaı jumys istep jatyr
«Biz Elbasynyń tapsyrmasyn oryndap, memlekettik qyzmetterdiń 80 paıyzyn elektrondy túrde kórsetý deńgeıine qol jetkizdik. Buǵan eń aldymen «Memlekettik qyzmetter týraly» zańdy qabyldaý arqyly jáne «Smart Bridge» jobasynyń kómegimen jetip otyrmyz», - dedi Asqar Jumaǵalıev QR Tsıfrlyq damý, ınnovatsııalar jáne aeroǵarysh ónerkásibi mınıstrliginiń keńeıtilgen alqa májilisinde.
Mınıstrdiń aıtýynsha, qujattardyń ortasha paketi 30 paıyzǵa azaıyp, memlekettik qyzmetterdi kórsetý ýaqyty úsh ese (31 kúnnen 10 kúnge deıin) qysqarǵan.
«Kúndelikti memlekettik qyzmetti alyp júrip, muny bárimiz sezindik degen oıdamyn. Azamattarǵa yńǵaıly bolýy úshin mekenjaı anyqtamasyn múlde alyp tastadyq. Arnaıy Halyqqa qyzmet kórsetý ortalyqtarynda avtokólik ıeleri burynǵydaı polıtsııa qyzmetkerlerimen tikeleı jumys istemeıdi. Áli de ıdeıalar mol. Sol úshin bul baǵyttaǵy jumysty belsendi túrde jalǵastyrýymyz kerek», - dedi Asqar Jumaǵalıev.
Mınıstr songymen qatar memlekettik qyzmetti alýshylardyń keri baılanysynan habar alý úshin alǵashqy ret tsıfrlyq komıssarlar otrıady qurylǵanyn, onyń quramyna qoǵam qaıratkerleri men blogerler, jýrnalıster kirgenin aıtyp ótti.
«Memlekettik qyzmetterdi qalaı yńǵaıly etemiz degen syńaıda qazirge deıin 100-ge tarta pikir aldyq. Bıyl Memleket basshysynyń tapsyrmasyn oryndap, memlekettik qyzmetterdiń 90 paıyzyn elektrondy formatqa aýystyrýymyz kerek», - dedi ol.
