«Tsıfrlyq Qazaqstan»: OQO-da ustazdar, ata-analar men balalar saıysqa tústi

ShYMKENT. QazAqparat  - Shymkenttegi bilim berý mekemeleri arasynda alǵash ret «Tsıfrlyq Qazaqstan» zııatkerlik saıysy ótti. Baıqaýdy qalalyq ákimdik pen QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń OQO boıynsha departamenti uıymdastyrdy, dep habarlaıdy  QazAqparat tilshisi.

Jańa tehnologııanyń qyr-syryn meńgergenderdiń birinshiligine Shymkent qalasynyń ákimi Nurlan Saýranbaev qatysty. Atalǵan saıys «Tsıfrlyq Qazaqstan» memlekettik baǵdarlamasyn júzege asyrý barysynda halyqqa elektrondy qyzmet kórsetýdi jedeldetý men jeńildetý maqsatynda uıymdastyryldy. Onda qalalyq bilim mekemelerinen iriktelgen úzdik 5 mekteptiń toptary ózara baq synady. Toptyń quramynda eki-ekiden ustaz, oqýshy men ata-ana boldy. Solardyń arasynan oza shapqan №65 mektep-gımnazııasynyń «Sandyq álem.kz» komandasy jeńiske jetti.

«Tsıfrly Qazaqstan» zııatkerlik saıysynda qatysýshylar e-gov.kz elektrondy úkimet portalyndaǵy halyqqa qyzmet kórsetý túrlerine qatysty bilimderin jan-jaqty kórsete bildi.

Uıymdastyrýshylar aldaǵy ýaqytta bul saıys estafeta túrinde qaladaǵy barlyq mektepterde jalǵasatynyn aıtady.

«Elimizde sybaılas jemqorlyqqa qarsy birshama jumystar atqarylyp jatyr. Sonyń biri - Elektrondyq  úkimet portaly Bul portalda qarapaıym halyqqa 400-den astam qyzmet kórsetiledi. Tıimdiligin aıtatyn bolsaq, úıden shyqpaı-aq sanaýly mınýttarda júzdegen qyzmet túrlerin ala alady», - dedi OQO Memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Álı Kómekbaev.