Tsıfrlyq Qazaqstan: Meduıymdar qaǵaz shyǵyndaryn qysqartýdan 700 mln teńge únemdedi

NUR-SULTAN. QazAqparat - QR Densaýlyq saqtaý vıtse-mınıstri Kamaljan Nadyrov densaýlyq saqtaý salasyndaǵy jemqorlyqtyń aldyn alý sharalary týraly aıtyp berdi, de habarlaıdy QazAqparat tilshisi.

«Densaýlyq saqtaý salasyna tsıfrlandyrý júıesin engizý arqyly medıtsınalyq qyzmet kórsetýdegi jemqorlyq qaýipter azaıdy jáne tómendegi áleýmettik nátıjeni berdi. Emhanaǵa barý shamamen eki esege azaıdy. Dárigerdi kútý ýaqyty da eki ese qysqardy. Qaǵaz ben rentgen plenkasynyń shyǵyndaryn únemdeý arqyly jylyna 700 mln teńge bıýdjette qaldy. Munyń barlyǵy - tsıfrlandyrýdyń bergen múmkindikteri», - dedi K. Nadyrov QR Sybaılas jemqorlyqqa qarsy is-qımyl agenttiginde ótken jınalysta.

Onyń aıtýynsha, qazirgi ýaqytta 50 memlekettik qyzmettiń 28-i elektrondy formatta kórsetiledi. Jyl sońyna deıin bul kórsetkishti 80 paıyzǵa jetkizý josparlanǵan.

Sonymen birge, vıtse-mınıstr jemqorlyq qaýipter boıynsha Dárilik zattar men medıtsınalyq buıymdardy saraptaý ulttyq ortalyǵyna syrtqy taldaý júrgizilgenin eske saldy jáne jańadan qurylǵan mınıstrlik komıtetin tekserýdi usyndy.

«Jańadan qurylǵan Taýarlar men qyzmetterdiń qaýipsizdigi jáne sapasyn baqylaý komıtetine jemqorlyq qaýipter boıynsha taldaý júrgizýdi usynamyn. Biz úshin bul komıtette basynan bastap durys jumysty qalyptastyrý mańyzdy. Bul komıtettiń halyq arasynda sapaly medıtsınalyq kómek alý quqyǵyn qorǵaıtyn organǵa aınalǵanyn qalaımyz», - dedi Kamaljan Nadyrov.