«Tsıfrlyq Qazaqstan»: Aqtóbede jumyssyzdar men zeınetkerler kompıýterdi tegin meńgerip jatyr
AQTÓBE. QazAqparat - Aqtóbeniń Alǵa aýdanynda turǵyndar kompıýterde jumys isteýdi úırenip jatyr. «Tsıfrlyq Qazaqstan» baǵdarlamasy aıasynda 1500 adam tegin oqytylady, dep habarlaıdy QazAqparat tilshisi.
Zeınetkerler men bala kútimimen úıde otyrǵan áıelder, múmkindigi shekteýli azamattar kompıýter tilin meńgerýde. «Tsıfrlyq Qazaqstan» baǵdarlamasy aıasynda aýdan mektepteri men ındýstrıaldy-tehnıkalyq kolledjdiń ınformatıka pániniń muǵalimderi kompıýterlik saýattylyq arttyrý sabaqtaryn tegin ótkizedi. Barlyǵy 16 muǵalim aldyn ala daıyndyqtan ótti.
«Aýdan turǵyndary úshin 14 mektepte jáne eki kolledjde tegin dáris ótip jatyr. Olar eń aldymen kompıýterde jumys isteýdi meńgeredi. Sondaı-aq egov.kz elektrondy portalyna tirkelý men ǵalamtorda onlaın saýda jasaý tetikterin bilip shyǵady. Tsıfrlyq saýattylyqty ashý kýrstary aýdanda tamyz aıynyń sońyna deıin júredi. Búginde aýdan boıynsha kompıýterlik saýattylyq arttyrý sabaqtaryna 200-den astam adam kelip, bazalyq daǵdylardy úırendi. Jospar boıynsha úsh aı merzim ishinde 1500 adamdy oqytamyz. Jumyssyzdarǵa, zeınetkerlerge, múmkindigi shekteýli azamattarǵa basymdyq berilip otyr. Sonymen qatar, kompıýterdi meńgeremin degen kez kelgen nıet bildirýshilerdi tegin qabyldaımyz»,- dedi Alǵa aýdany ákiminiń orynbasary, aýdan boıynsha tsıfrlandyrýdy engizý jáne úılestirý máseleleri boıynsha jaýapty maman Ánýarbek Qonjar.
Aıta keteıik, ótken jyly elimizde «Tsıfrlyq Qazaqstan» baǵdarlamasy qabyldandy. Jospar boıynsha 2020 jyly turǵyndardyń tsıfrlyq saýattylyǵyn 80 paıyzǵa arttyrý qajet.
