Tsıfrlyq eriktiler elektrondyq memlekettik qyzmetterdi alýǵa kómektesedi

NUR-SULTAN. QazAqparat - 500-ge jýyq erikti Azamattarǵa arnalǵan úkimet pen QR Memlekettik qyzmet isteri agenttigimen birlese otyryp, memlekettik qyzmetti onlaın rejıminde alý daǵdylary boıynsha uıymdastyrǵan tıisti oqý kýrstarynan ótti, dep habarlaıdy QazAqparat «Azamattarǵa arnalǵan úkimet» korporatsııasyna silteme jasap.

Eriktiler azamattarǵa mobıldi azamattar bazasynda tirkelýge, ETsQ alýǵa, halyqqa qyzmet kórsetý ortalyǵyna kezekti brondaýǵa, sondaı-aq egov.kz portalynda elektrondyq qyzmetterdi alýǵa kómektesedi dep josparlanyp otyr.

Azamattarǵa arnalǵan úkimettiń tóraıymy Ásemgúl Baltashevanyń aıtýynsha, memlekettik korporatsııa tótenshe jaǵdaı men karantın engizilgenge deıin de eriktiler uıymdarymen yntymaqtastyq qura bastaǵan. «Óńirlerdegi túsindirme jumystaryna eriktiler tartyldy, olar HQO-ǵa kelýshi azamattarǵa keńes bere otyryp, bizge úlken qoldaý kórsetip jatyr. HQO-lar 2 aıǵa jýyq ýaqyt jumys istemegendikten, qyzmet alýshylardyń sany kúrt kóbeıdi. Sondyqtan qazirgi ýaqytta bizdiń barlyq maman memlekettik qyzmetterdi kórsetýmen aınalysýda», – dedi Ásemgúl Baltasheva.
Eske salaıyq, halyqqa qyzmet kórsetý ortalyqtarynyń ǵımarattarynda elektrondyq qyzmetter budan bylaı kórsetilmeıdi. Olardy ákimdikterde, saýda jáne oıyn-saýyq ortalyqtarynda, medıtsınalyq uıymdar men ýnıversıtetterde jáne t.b. jerlerde ornalasqan arnaıy egov buryshtarynan alýǵa bolady. Qazirgi ýaqytta Qazaqstanda 600-den astam osyndaı burysh bar. Eriktiler azamattarǵa sol jerlerde de keńes beredi dep josparlanǵan. Sondaı-aq qyzmetterdi óz betinshe alý boıynsha keńester halyqqa qyzmet kórsetý ǵımaratynyń kireberisinde jáne tsıfrly halyqqa qyzmet kórsetý ortalyqtarynda kórsetiledi.
Qyzylordalyq «Golden Qazaqstan» jastar qoǵamdyq birlestiginiń tóraǵasy Baqytbek Kenjebektiń aıtýynsha, olar eń aldymen HQO-nyń jumys barysymen, qyzmet kórsetýdiń jańa formatymen tanysyp, oqýdan ótken. «Munda eriktiler óz biliktilikterin arttyryp qana qoımaı, halyqtyń kóp suratatyn memlekettik qyzmetteri boıynsha keńes berip, ózine-ózi qyzmet kórsetý buryshtarynda turǵyndarǵa onlaın qyzmetterdi alý joldaryn túsindirip, kómek kórsetip jatyr. Kishkene bolsa da halyqtyń kádesine jarap, tsıfrlyq daǵdylaryn joǵarylatýǵa kómektesip jatqanymyzǵa qýanyshtymyz», – dep tolyqtyrdy Baqytbek Kenjebek.
Aıta ketý kerek, halyqqa qyzmet kórsetý ortalyqtarynda jumys istegisi keletin jastardyń kópshiligi Qaraǵandy oblysy men Shymkent qalasynan. Eń azy – Pavlodar oblysynan.