Tsıfrlyq dáýirde gýmanızm men rýhanı qundylyqtar ıdeıalaryn nasıhattaý kerek - Toqaev
Óz sózinde Prezıdent tsıfrlyq dáýirde ómir súrip jatqanymyzdy eskerip, gýmanızm men rýhanı qundylyqtar ıdeıalaryn júıeli túrde alǵa jyljytý qajettigin aıtty.
«Biz jańa tehnologııalardyń adam ómirin túbegeıli ózgertetinin kórip otyrmyz. Pandemııa bul protsesterdi jedeldetti. Tsıfrlyq kommýnıkatsııalar, ınternet, áleýmettik jeliler búkil álemdegi adamdar arasyndaǵy shekarany alyp tastaýda úlken ról atqarady. Degenmen, osy oń elementtermen qatar tsıfrlyq tehnologııalar áserinen qoǵamnyń qalaı ydyraıtynyn da baıqadyq. Kóptegen adamdar úshin tsıfrlyq álem, ókinishke oraı, naqty álemdi almastyrdy», - dedi Prezıdent «Álemdik jáne dástúrli dinder lıderleriniń pandemııadan keıingi kezeńdegi adamzattyń rýhanı jáne áleýmettik damýyndaǵy róli» plenarlyq otyrysynda.
«Din ár ýaqytta bilim berý qyzmetin atqaryp keldi. Quran, Іnjil, Táýrat jáne basqa da kóptegen rýhanı kitaptar árqashan gýmanızm men beıbitshilik ıdeıalaryna toly boldy. Bul kitaptar únemi toleranttylyqty jaqtap, zorlyq-zombylyq pen qaqtyǵystardy aıyptady, sondyqtan qazirgi ýaqytta bul qundylyqtardy adamdarǵa jetkizý qajet», - dedi Qasym-Jomart Toqaev.
Aıta keteıik, búgin elordada Álemdik jáne dástúrli dinder lıderleriniń VII sezi ótip jatyr. Eki kúnge sozylatyn sezge 50 elden 100-den astam delegatsııa, onyń ishinde ıslam, hrıstıan, býddızm, ıýdaızm, ındýızm, daosızm, zoroastrızm, sıntoızm dinderiniń ókilderi, sondaı-aq saıası jáne qoǵam qaıratkerleri, halyqaralyq uıymdar músheleri kelgen.
Dinı forýmǵa Rım Papasy Frantsısk, Ál-Azhardyń Joǵarǵy ımamy Ahmed Mohammed Ahmed at-Taıeb, Ierýsalım Patrıarhy III Teofıl, Ashkenazdyń bas ravvıni Davıd Laý, Izraıldiń Bas sefard ravvıni Itshak Iosıftiń jáne basqa da dinı jetekshiler, sondaı-aq birqatar halyqaralyq uıym ókilderi qatysýda.
