Tsıfrlyq damý mınıstrliginiń kásiporyn basshysy «Baıqońyrdaǵy» metall úshin para alǵan

NUR-SULTAN. QazAqparat – Qyzylorda qalalyq №2 sotynyń úkimimen Tsıfrlyq damý, ınnovatsııalar jáne aeroǵarysh ónerkásibi mınıstrligine qarasty «Infrakos» sharýashylyq júrgizý quqyǵyndaǵy respýblıkalyq memlekettik kásiporyn bas dırektorynyń mindetin atqarýshy qomaqty kólemde aıyppul arqalady, dep habarlaıdy QazAqparat tilshisi.

Sybaılas jemqorlyqqa qarsy is-qımyl agenttiginiń asa mańyzdy ister jónindegi tergeýshisi Danııar Begaıdarovtyń aıtýynsha, kásiporyn basshysy «Baıqońyr» ǵarysh aılaǵynyń aýmaǵynan 200 tonna qara metaldyń kedergisiz áketilýine jol bergen.

«Irıýkov «Baıqońyr» ǵarysh aılaǵynyń alańynda (Reseı jalǵa alǵan aýmaq) ornalasqan «Infrakos» ShJQ RMK aýmaǵynan 200 tonna qara metaldy kedergisiz áketkeni úshin jeke kompanııa ókilinen jalpy somasy 600 myń teńgeni quraıtyn, júıeli negizde para aldy degen kúdikke ilindi», - deıdi agenttik ókili.

Sot sheshimi boıynsha bas dırektordyń mindetin atqarýshy K.S. Irıýkov Qylmystyq kodekstiń 366-baby 2-bóligi boıynsha ómir boıyna memlekettik qyzmette jumys isteý quqyǵynan aıyrylyp, 17,6 mln teńge aıyppul tóleıtin boldy. Bul, ol alǵan paranyń 30 eselengen mólsherine teń.