Tsıfrlyq damý mınıstrligine jańa mindetter júkteledi

ASTANA. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstrligine birqatar jańa quzyret berilmek, dep habarlaıdy QazAqparat tilshisi.

Ashyq NQA portalynda jarııalanǵan Úkimet qaýlysynda jazylǵandaı, vedomstvoǵa myna fýnktsııalar beriledi:

- oblystyń, respýblıkalyq mańyzy bar qalalardyń jáne astananyń jergilikti atqarýshy organdary úshin kompıýterlik jáne mýltımedııalyq jabdyqtardy satyp alýdy júrgizedi;

- memlekettik organdardyń aqparattyq júıelerin rezervke qoıýdy qamtamasyz etý;

- memlekettik qyzmetter kórsetý máseleleri boıynsha normatıvtik quqyqtyq aktilerdi ýaqtyly qabyldamaǵany úshin memlekettik organdar men uıymdar basshylarynyń jaýapkershiligi týraly usynystar engizý;

- tsıfrlandyrý kezinde shyǵystardyń bir bóligin óteý boıynsha aýyl sharýashylyǵy jáne ónerkásip obektilerinde baılanys qyzmetterin sýbsıdııalaý qaǵıdalaryn ázirleý jáne bekitý;

- abonenttik qurylǵylar arqyly halyqty ortalyqtandyrylǵan shuǵyl jappaı habardar etýdi qamtamasyz etý;

- QR Memlekettik geodezııalyq, nıvelırlik jáne gravımetrııalyq jelileriniń pýnktteri men belgilerin salý, tekserý jáne qalpyna keltirý jónindegi nusqaýlyqty ázirleý jáne bekitý;

- ınnovatsııalyq qyzmetti damytýdyń Ulttyq ındeksin esepteý ádistemesin ázirleý jáne bekitý;

- aýyldyq eldi mekenderde túpkilikti tutynýshyǵa deıin talshyqty-optıkalyq baılanys jelilerin salý jónindegi baılanys operatorlarynyń shyǵyndaryn óteýge konkýrs ótkizý qaǵıdalaryn ázirleý jáne bekitý jáne basqa da mindetter.

Qujatta jazylǵandaı, bul ókilettikter «QR memlekettik basqarý júıesin odan ári jetildirý jónindegi sharalar týraly» Prezıdent Jarlyǵyn iske asyrý şeńberinde berilip otyr.

Úkimet qaýlysy 16 maýsymǵa deıin kópshilik talqylaýda bolady.