Tsıfrlyq damý mınıstrligine jańa mindet júkteldi

ASTANA. QazAqparat – Premer-Mınıstr Álıhan Smaıylov «Qazaqstan aýmaǵynda orman jáne dala órti kezinde Jerdi qashyqtan zondtaý derekterin berý boıynsha vedomstvoaralyq ózara is-qımyldy qamtamasyz etý jónindegi sharalar týraly» ókimine qol qoıdy, dep habarlaıdy QazAqparat tilshisi.

Ókimge sáıkes, orman jáne dala órti kezinde Tsıfrlyq damý, ınnovatsııalar jáne aeroǵarysh ónerkásibi mınıstrligi mynalardy oryndaýǵa mindetti:

- mchs.gharysh.kz jáne forest.gharysh.kz keńistiktik derekter geoservısteriniń irkilissiz jumysyn isteýin qamtamasyz etýge;

- Tótenshe jaǵdaılar mınıstrliginiń oblystardyń, respýblıkalyq mańyzy bar qalalardyń jáne astananyń tótenshe jaǵdaılar departamentterine jáne Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıtetine mchs.gharysh.kz jáne forest.gharysh.kz keńistiktik derekter geoservısteri arqyly janý aýmaǵynda Jerdi qashyqtan zondtaý derekterin berýge;

- Tótenshe jaǵdaılar, Ekologııa jáne tabıǵı resýrstar mınıstrlikteri men olardyń aýmaqtyq bólimsheleriniń jumysy úshin qajetti keńistiktik derekterdi (termaldy núktelerdiń, órt sóndirý bólimderi men stantsııalardyń ornalasqan jeriniń, áýe kóligimen dońǵalaqty kólik sý alatyn jerlerdiń, erekshe qorǵalatyn tabıǵı aýmaqtar shekaralarynyń sıpattamasyn qamtıtyn derekter) mchs.gharysh.kz jáne forest.gharysh.kz keńistiktik derekter geoservısterinde ýaqtyly júktelýin qamtamasyz etýge;

- Tótenshe jaǵdaılar, Ekologııa jáne tabıǵı resýrstar mınıstrlikteri mchs.gharysh.kz jáne forest.gharysh.kz keńistiktik derekter geoservısterin paıdalaný tártibin tıisti vedomstvolyq quqyqtyq aktilerde jáne jaýapty qyzmetkerlerdi bekite otyryp, olardy paıdalanýdy jáne órt qaýipti kezeńde kúndelikti monıtorıngteýdi qamtamasyz etedi.

Aıta keteıik, Qazaqstanda orman órtin ǵaryshtan baqylaıtyn tórt spýtnık bar.