Tsıfrlyq damý mınıstrligine aktıvter men maınıng salasyn retteý quzyreti berilmek

ASTANA. QazAqparat – Tsıfrlyq damý, ınnovatsııalar jáne aeroǵarysh ónerkásibi mınıstrligine tsıfrlyq aktıvter men maınıngti retteý úshin qosymsha quzyret berilýi múmkin. Bul týraly «Ashyq» NQA portalynda jarııalanǵan Úkimet qaýlysynyń jobasynda jazylǵan, dep habarlaıdy QazAqparat tilshisi.

Ózgeriske sáıkes, endi atalǵan vedomstova myna quzyretter beriledi:

- azamattyq hal aktilerin memlekettik tirkeý qyzmetterin kórsetýge aqy tóleý mólsherin QR Ádilet mınıstrligimen jáne monopolııaǵa qarsy organmen aıqyndaý;

- tsıfrlyq aktıvter salasyndaǵy memlekettik saıasatty iske asyrý;

- tsıfrlyq maınıng jónindegi qyzmetti júzege asyrýǵa arnalǵan lıtsenzııalardy beredi;

- salyq salý úshin tsıfrlyq maınerler men tsıfrlyq maınıngtik pýldardyń kiristeri týraly málimetterdi usyný qaǵıdalaryn bekitý;

- tsıfrlyq maınıngtik pýldardy akkredıtteý qaǵıdalaryn bekitý jáne júrgizý;

- qamtamasyz etilgen tsıfrlyq aktıvterdi shyǵarý jónindegi qyzmetti júzege asyratyn tulǵalardyń memlekettik tizilimin júrgizedi;

- tsıfrlyq maınıngke arnalǵan apparattyq-baǵdarlamalyq keshendi esepke alý jáne onyń tizilimin júrgizý qaǵıdalaryn bekitý;

- qamtamasyz etilgen tsıfrlyq aktıvterdi shyǵarý jáne olardyń aınalysy jónindegi qyzmetti júzege asyrýǵa ruqsat berý;

- memlekettik kórsetiletin qyzmetterdi avtomattandyrý protsesterin baǵalaýdy júzege asyrý.

«Bul normalar «QR keıbir zańnamalyq aktilerine tsıfrlyq aktıvter jáne aqparattandyrý máseleleri boıynsha ózgerister men tolyqtyrýlar engizý týraly» Zańy sheńberinde tolyqtyryldy jáne 2023 jylǵy 1 sáýirden bastap qoldanysqa engiziledi», - dep túsindirme berilgen qaýlyǵa.

Qujat 30 naýryzǵa deıin kópshilik talqylaýda bolady.