Tsıfrlyq damý mınıstrligi ınternet sapasyn tekseretin saıt ashty

NUR-SULTAN. QazAqparat – Elimizde ınternet sıgnalynyń sapasyn tekseretin «Baılanys bar» veb-saıty ashyldy. Bul týraly QR tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy QazAqparat tilshisi.

«Bul saıt ınternettiń álsiz sıgnalyn tirkeýge alady. Saıtqa kirgende bir ǵana batyrma arqyly baılanys sıgnalyn tirkeýge bolady. Bul derekter bizdiń mınıstrliktiń derekter bazasyna kelip túsedi. Osylaısha, qandaı da bir eldi meken men naqty geolokatsııada baılanys sıgnalynyń álsiregenin kóre alamyz. Tıisinshe, biz qadaǵalaýshy organ retinde operatorlardan talap etemiz. Biz operatorlarǵa lıtsenzııa beremiz jáne olar belgili jaǵdaı boıynsha sapaly baılanyspen qamtýǵa mindetti. Al biz sapany qadaǵalaımyz», - dedi mınıstr Ortalyq kommýnıkatsııalar qyzmetinde.

«Saıtqa kez kelgen adam kire alady jáne óz aınalasyndaǵy ınternet sapasyn tirkeı alady. Barlyq derekti jınaǵan soń, ári qaraı ne isteý kerektigin josparlaımyz. Óıtkeni, elimizdiń aýmaǵy orasan úlken jáne bizdiń josparymyz operatorlardyń naqty múmkindikterimen ushtasýy qajet», - dedi B. Mýsın.

Buǵan deıin mınıstr ınterneti joq aýyldar men shatyrǵa shyǵyp sabaq oqıtyn balalar týraly pikir bildirgen edi.