«Tsıfrly ustaz» jobasy iske asyrylady

NUR-SULTAN. QazAqparat – Elimizde «Tsıfrly ustaz» jobasy iske asyrylady. Bul týraly Úkimet otyrysynda QR Ulttyq ekonomıka mınıstri Áset Erǵalıev málim etti, dep habarlaıdy QazAqparat tilshisi.

Mınıstrdiń aıtýynsha, Prezıdent Joldaýyn iske asyrý jalpyulttyq josparynyń úshinshi baǵytynda 12 is-sharany iske asyrý kózdelgen.

«Tıptik oqý josparlaryn alyp tastaý boıynsha «Bilim berý týraly» Zańǵa ózgerister engiziledi. Muǵalimderdi 3 jylda bir ret qaıta daıarlyqtan ótkizýdi uıymdastyrý josparlanýda. Qashyqtan bilim berýge qajetti aqparattyq júıeniń sapasyn jaqsartý, sonymen birge «Tsıfrly ustaz» jobasy iske asyrylady», - dedi Áset Erǵalıev.

Onyń atap ótýinshe, daryndy balalarǵa jáne olardyń ustazdaryna jan-jaqty qoldaý kórsetiledi. Halyqaralyq pán olımpıadalarynyń júldegerlerine granttar berý, sonymen birge birrettik aqshalaı syıaqy da tóleý kózdelýde.

«Mektepterdegi oryn tapshylyǵy problemalaryn sheshý úshin 2025 jylǵa deıin keminde 1000 mektep salý josparlanýda. «Jas talap» jobasy aıasynda suranysqa ıe mamandyqtar boıynsha tegin tehnıkalyq jáne kásiptik bilimmen tolyq qamtamasyz etý kózdelip otyr», - dedi ol.