Tsıfrlandyrýdyń arǵy jaǵynda jasandy ıntellekt tur - Nursultan Nazarbaev
"Tsıfrlandyrý barlyq máselelerimizdi sheship beretin nárse emes. Bul - ındýstrııaldy revolıýtsııanyń basy ǵana. Demek, alda turǵan maqsat-mindetter kóp. Eń sońynda jasandy ıntellektke kelýimiz kerek", - dedi N.Nazarbaev Úkimettiń keńeıtilgen otyrysynda.
Prezıdenttiń aıtýynsha, taý-ken salasyna aqparattyq texnologııalardy engizý arqyly eńbek ónimdiligin arttyrýǵa bolady. Sebebi jumys avtomatty túrde júredi. Ásirese, densaýlyq pen bilim salasyna tsıfrlandyrýdy keńinen engizgen jón. Sonyń arqasynda shalǵaı aýylda otyrǵan adamnyń desaýlyǵyn baqylaýǵa ári bilimin arttyrýǵa múmkindik bar. Al adam kapıtalyn arttyrsaq, el ekonomıkasyn da kóterýge bolady.
Memleket basshysy Nursultan Nazarbaev Úkimet basshysynyń orynbasary Asqar Jumaǵalıevke eskertý de jasady. Sebebi dál osy máselege jaýapty vıtse-premer tsıfrlandyrýdyń mańyzdylyǵyn túsinikti tilde baıandaı almady.
"Búgin bizde semınar ótip jatyr dep kóreıik. Dál osylaı túsindiretin bolsaq, shopandy bylaı qoıǵanda, basshynyń ózi túsinbeıdi. Sen tsıfrlandyrýdy táptishtep túsindire bilýiń kerek. Tsıfrlandyrý qaıdan shyqty? Ne úshin kerek? Máselen, Sarybaı-Sokolov taý-ken kombınatyn alaıyq, olar karer jumystaryn avtomatty túrde baqylap otyrady. Sonyń arqasynda óz shyǵyndaryn 30 paıyzǵa azaıtty. Kim biledi, bolashaqta karerde kólik júrgizýshileri de bolmaıtyn shyǵar. Osylaısha, óndiris kólemin arttyrýǵa bolady. Áıtpese, qazirgi básekege tótep berý múmkin emes. Mine, osylaı túsindirý kerek", - dep atap kórsetti N.Nazarbaev.
Prezıdenttiń aıtýynsha, densaýlyq salasyndaǵy tsıfrlyq texnologııalar árbir adamnyń densaýlyǵyn onlaın rejımde baqylaýǵa múmkindik beredi. Sonyń arqasynda dárigerler qaǵazbasty jumystan qutylady. Sol sııaqty keden men salyq salasyn tsıfrǵa aýystyrý arqyly biraz jumysty jedeldetýge bolady. Shekarada júk kólikteri kóp bógelmeıdi. Jalpy, 2025 jylǵa qaraı tsıfrlandyrýdyń tıimdiligi 2 trln teńgege jetedi degen boljam bar.
