Tsıfrlandyrý protsesine barlyǵy qatysýy kerek - Prezıdent

ASTANA. QazAqparat - Memleket basshysy Nursultan Nazarbaev sheneýnikter men kompanııalar basshylaryn tsıfrlandyrý úderisine erekshe nazar aýdarýǵa shaqyrdy, dep habarlaıdy QazAqparat.

«Úshinshi jańǵyrý baǵdarlamasy eńbek ónimdiligin aıtarlyqtaı arttyrýdy, bizdiń taýarlardyń eksportyn keńeıtýdi talap etedi. Indýstrıaldy saıasattyń negizgi baǵyty 4.0 tehnologııalaryn engizýge qatysty bolyp otyr. Bul baǵyttyń mán-jaıyn tyńǵylyqty túsiný kerek. Osyǵan baılanysty «Tsıfrlyq Qazaqstan» baǵdarlamasy daıyn. Sondyqtan ony júzege asyrýǵa barlyǵy qatysýy kerek, ıaǵnı árbir mınıstrlik, ákimdik, sondaı-aq Qazaqstandaǵy ár kompanııa qamtylýy tıis», - dedi Elbasy jalpyulttyq telekópir barysynda.

Sonymen qatar Prezıdent jaqynda Astana tsıfrlandyrý boıynsha aýqymdy forýmdy qabyldaıtynyn eske salyp ótti.

«Tsıfrlandyrý turǵysynda Reseımen, Belarýspen jáne basqa eldermen ýaǵdalasqan qadamdar aıasynda aldaǵy EAEO forýmyn barynsha jemisti ótkizý mańyzdy. Men Premerdiń orynbasary retinde arnaıy Asqar Jumaǵalıevti taǵaıyndadym. Ol ár aı saıyn qandaı kompanııa men kásiporyn tsıfrlandyrýǵa kóshkendigi týraly, sondaı-aq olar qandaı nátıjege qol jetkizgendigi jaıynda baıandaýy tıis», - dedi Memleket basshysy.

Aıta keteıik, Astanada Elbasynyń qatysýymen «Jańa ındýstrııalandyrý: qazaqstandyq barystyń qadamy» ulttyq telekópiri ótti. Shara barysynda onlaın rejıminde búkil el boıynsha jańa ındýstrııalyq-ınnovatsııalyq, ınfraqurylymdyq, energetıkalyq, agroónerkásiptik jobalar iske qosyldy.