Tsıfrlandyrý mınıstrdiń jumysyn emes, xalyqtyń ómirin jeńildetý kerek - Estonııanyń tájirıbesi

ASTANA. QazAqparat - Estonııanyń eks-prezıdenti Toomas Hendrık Ilves óz elinde tsıfrlandyrýdyń qalaısha iske asqanyn aıtyp berdi. Búginde atalǵan memlekette úsh-aq qyzmetti alý úshin adam ózi kelýi kerek. Qalǵanyn onlaın rejımde jasaýǵa bolady, dep xabarlaıdy QazAqparat tilshisi.

«Bizde shamamen 500 qyzmetti elektrondy túrde alýǵa bolady. Sony xalyqtyń 99 protsenti qoldanady. Úsh-aq qyzmet elektrondy formatta kirmeıdi. Birinshiden, adam úılense, ıa bolmasa, turmysqa shyqsa, ózi kelýi kerek. Ekinshiden, jerdi satyp alýǵa bolmaıdy. Al jyljymaıtyn múlikti satyp alý úshin mindetti túrde notarıýsqa kóriný kerek. Úshinshiden, adam ajyrasqanda ózi keledi. Qalǵan qyzmetterdiń bárin onlaın rejımde alýǵa múmkindik bar», - dedi Toomas Hendrık Ilves Tsıfrlandyrý jónindegi xalyqaralyq sarapshylardyń otyrysynda.

Onyń aıtýynsha, memlekettik qyzmetter elektrondy formatta bolsa, jumystyń tıimdiligi arta túsedi. Bıýrokratııa azaıady. Memlekettik apparattyń shtaty ta qysqarady. Bunyń barlyǵy biraz qarajatty únemdeýge múmkindik beredi. "Sonda ne isteý kerek? Texnologııa jaǵynan qıyndyq joq. Sebebi aınalanyń barlyǵy - texnologııa. Eń bastysy, batyl saıası sheshim bolýy qajet. Úkimet naqty mindet qoısa ǵana tsıfrlandyrý sharalary atqarylady. Estonııa solaı istedi. Bas kezinde biz artta boldyq. Halyqtyń ózi senbedi. Biraq biz eldi tsıfrlandyrýdy iske asyra aldyq. Biz qarjy mınıstriniń jumysyn emes, xalyqtyń ómirin jeńildetýge tyrystyq. Sol arqyly qazirgi jetistikke jetip otyrmyz", - dep atap kórsetti Toomas Hendrık Ilves.

Aıta keteıik, búgin Astana ekonomıkalyq forýmy aıasynda Tsıfrlandyrý jónindegi xalyqaralyq sarapshylar keńesiniń otyrysy ótti. Sol jerde Amazon-nyń bas menedjeri Tonı Van Den Berg Qazaqstanda elektrondy saýda-sattyqty damytý boıynsha keńes berdi.