Tsıfrlandyrý Qazaqstanǵa ne beredi - brıtandyq saıasatker pikiri
«Qazaqstandaǵy tsıfrlandyrýdyń keleshegi óte zor, sebebi oǵan jetekshilik etýde óte durys tásilder jasalyp keledi, basymdyqtar aldyn ala anyqtalady. Sizderdiń qalalaryńyzda jaqsy tsıfrlyq ınfraqurylym bar. Endigi qajetti komponent senim men myqty mamandar bolmaq. Sondaı-aq, aqparattyq qaýipsizdik pen kadrlyq saıasat jumystary da qajet dep oılaımyn", - dedi ol QazAqparat tilshisine bergen suhbatta.
Sondaı-aq, L. Maksvell tsıfrlandyrýdy tolyq júzege asyrǵanda memleketke qandaı paıda keletinin aıtty.
«Tsıfrlyq úkimet qarajatty únemdeıdi jáne shyn máninde halyq úshin jumys isteıtin úkimetke aınalady. Tsıfrlyq ekonomıka únemi jumys oryndarymen qamtamasyz etedi. Ulybrıtanııada ortasha jalaqy jylyna 25 000 - 27 000 fýnt sterlıng bolsa, tsıfrlyq ekonomıkada - 41 000 fýnt. Osylaısha, tsıfrlyq ekonomıkada jumys isteý arqyly kóbirek qarajat tabýǵa bolady», - dedi brıtandyq saıasatker.
Sonymen birge, L. Maksvell óz elindegi tsıfrlandyrý úderisteri týraly aıtyp berdi.
«Bizde de tsıfrlyq ekonomıkanyń qarqyndy damýy baıqalýda. Ulybrıtanııa ekonomıkasynyń 15 paıyzyn tsıfrlyq ekonomıka quraıdy. Onyń ósý qarqyny ekonomıkanyń ózge bólikterimen salystyrǵanda eki esege joǵary. Ońtústik Koreıa, tipti jer aýmaǵy kishkentaı Estonııa men Jańa Zelandııada aýqymdy ózgerister bolyp jatyr, ol eldiń azamattary tehnologııalardy jyldam ári tıimdi paıdalanady», - dep atap ótti sarapshy.
Sonymen birge, ol jańa tehnologııalardy jasaýda myqty ári ashyq ınfraqurylymnyń mańyzdylyǵyn basa aıtty.
«Kóptegen eldiń úkimeti tsıfrlyq shıelenisterdi sheshýde qınalady. Búkil álemdegi tsıfrlyq ekonomıkanyń damýyna qarar bolsaq, Qazaqstandaǵydaı bilikti jetekshilik jumysty baıqaýǵa bolady. Sondyqtan, sizderde úlken tabysqa jetý múmkindigi bar. Aqparattyq tehnologııalar ýnıversıtetin qurý arqyly bilikti kadrlardyń ósýine jaǵdaı jasadyńyzdar. Odan bólek, aqparattyq qaýipsizdikti nyǵaıtý da tsıfrlyq ekonomıkaǵa degen senimdi arttyrady», - dep óz sózin túıindedi L. Maksvell.
