Tsıfrlandyrý baǵytynda tolyq qarjylandyrýǵa ekpin qoıý kerek - Nurlan Beknazarov
NUR-SULTAN. QazAqparat - Búgin Parlament Senatynyń jalpy otyrysynda depýtat Nurlan Beknazarov tsıfrlandyrý baǵdarlamasyn tolyq qarjylandyrý máselesin nazarǵa alýdy usyndy, dep habarlaıdy QazAqparat tilshisi.
«Sońǵy kezderi óńirlerdiń áleýmettik-ekonomıkalyq damýyna aıryqsha nazar aýdarylyp otyrǵany belgili. Osy baǵyttaǵy baǵdarlamalardy iske asyrýǵa respýblıkalyq bıýdjetten jyl saıyn aıtarlyqtaı qarajat bólinedi. Degenmen bul qarjyny tıimdi paıdalanýda únemi kemshilikterge jol beriledi. Sonyń saldarynan el ekonomıkasynyń órkendeýine qatysty ındıkatorlar jyl qorytyndysy boıynsha áli de qajeti joǵary mejelerge qol jetkizbeı keletinin atap ótkim keledi», - dedi N. Beknazarov.
Onyń sózine qaraǵanda, bıýdjet qarajatyn nátıjeli ıgerýge baǵyttalǵan júıeli ári keshendi josparlaý jumystarynyń qajetti deńgeıde júrgizilmeýinen, ázirlengen jáne saraptamadan ótken jobalyq-smetalyq qujattamalardyń iske asýy tıisti deńgeıde emes.
«Qazirgi ýaqytta azamattardy áleýmettik qorǵaý boıynsha kóptegen jumystar atqarylýda. Parlament tarapynan birneshe zańdar qabyldandy. Alaıda azamattardyń qaýipsizdigin qamtamasyz etý ózekti másele bolyp qala beredi. Osyǵan baılanysty aldaǵy ýaqytta respýblıkalyq bıýdjetti qaraý barysynda quqyq qorǵaý organdaryn jáne sot júıesin tsıfrlandyrý baǵdarlamasyn tolyq qarjylandyrý máselesin nazarǵa alýdy usynamyn», - dedi depýtat.
Budan buryn habarlanǵandaı, Senattyń jalpy otyrysynda «QR Úkimeti men Esep komıtetiniń 2018 jylǵy respýblıkalyq bıýdjettiń atqarylýy týraly esepteri talqylandy.
Aıta keteıik, depýtat Erbolat Muqaev tıimsiz kvazımemlekettik sektoryndaǵy mekemelerdiń jumysyn qaıta qarastyrý qajettigin jetkizdi.
Óz kezeginde senator Álimjan Qurtaev bıýdjettik qarajatty tıimsiz josparlaý ári tıimsiz paıdalaný úshin laýazymdy tulǵalardyń jaýapkershiligin kúsheıtý kerektigin atap ótti.
