Tsıfrlandyrý baǵdarlamasy: Qostanaıda 130 joba iske aspaq

QOSTANAI. QazAqparat - Qostanaıdaǵy páter ıeleriniń tutynýshylar kooperatıvi (PITK) «e-Qostanaı» júıesine qosylady, dep habarlaıdy QazAqparat.

Oblys ákimdiginde ótken jıynda Qostanaı oblysy ákimdiginiń aqparattandyrý, memlekettik qyzmetter kórsetý jáne arhıvter basqarmasynyń basshysy Erkebulan Ábdikárimov Qostanaıdaǵy PITK jańa júıege kóshetinin aıtty.

«Qostanaıda «Aqyldy baǵdarsham», «Aqyldy transport» jáne SmartKostanay syndy mobıldi qosymshalar iske qosylǵan. Sonymen qatar kópqabatty úılerdiń qabyrǵalaryna QR-kodtar ornatyldy. Bul ár ǵımarattyń tarıhy týraly málimet alýǵa múmkindik beredi. Qazirgi ýaqytta tsıfrlandyrý baǵdarlamasy boıynsha «e-PIK», «Aqyldy aýdan» jobalary jasalyp jatyr», - dedi Erkebulan Ábdikárimov.

Búginge deıin Qostanaıdaǵy 30 PITK «e-PIK» júıesine qosyldy. Jyl aıaǵyna deıin barlyq PITK jańa júıede jumys isteıtin bolady.

«Bul júıe PITK jumysynyń shynaıylyǵyn kórsetedi. Jumys kólemi, sapasy týraly málimetterdi qaraýǵa bolady. Jyl sońyna deıin 56 PITK qosylady», - dedi basqarmasy basshysy.

Jıynda aıtylǵandaı, oblysta tsıfrlandyrý baǵdarlamasy aıasynda 11 baǵytta 130 joba iske asady. Jol kartasy jasaldy, sharalarǵa óńirdiń barlyq qala-aýdany atsalysady.

Eske sala ketsek, Erkebulan Ábdikárimov aldaǵy ýaqytta Qostanaıdaǵy jolaýshylar avtobýstarynyń barlyǵy «Avto-Tóleý» júıesine qosylatynyn aıtqan bolatyn.