Tsıfrlandyrý áskerdiń kúsh-quraldaryn utymdy paıdalanýǵa múmkindik beredi
Qorǵanys mınıstrliginde Qazaqstan Qarýly Kúshterin tsıfrlandyrýdaǵy ózekti máseleler talqylandy. Sharaǵa Prezıdenttiń keńesshisi Baǵdat Mýsın, Qorǵanys mınıstrligi basshylyǵy, ásker túrleriniń bas qolbasshylary, óńirlik qolbasshylar qatysty.
Qorǵanys mınıstrligi eldiń qaýipsizdigine jaýap beretin memlekettik organ retinde armııany tsıfrlandyrýǵa kiristi. Ol úsh negizgi baǵyt boıynsha júrgiziledi. Atap aıtqanda, «Tsıfrly Qazaqstan» memlekettik baǵdarlamasynyń is-sharalaryn iske asyrýǵa qatysý, «Elektrondy úkimet» portaly arqyly halyqqa memlekettik qyzmet kórsetý, sondaı-aq áskerı maqsattaǵy basqarý júıesin avtomattandyrý men aqparattyq júıelerdi engizý.
«Armııany tsıfrlyq turǵyda jańǵyrtý máselesinde belgili bir nátıje bar. Tsıfrlyq tehnologııalardy engizý boıynsha tájirıbe jınaqtalyp, kúsh-quraldardyń qajetti áleýeti qurylýda. Sonymen qatar, Qarýly Kúshterde áli de atqaratyn is kóp», – dedi Qorǵanys mınıstri, general-leıtenant Nurlan Ermekbaev.
Sonymen qatar, ol komandırlerdiń qyzyǵýshylyǵy jáne jetkilikti qarjylandyrý bolmasa, nátıje bolmaıtynyn atap ótti. Barlyq deńgeıdegi komandırler avtomattandyrý men tsıfrlandyrýdyń ne beretinin túsinbeı, jaqsy nátıje bolmaıdy.
Ásker túrleri men tekteri, óńirlik bas qolbasshylar basqarmalarynyń qurylymyna avtomattandyrý jáne tsıfrlandyrý jónindegi ofıtserlerdi engizý qajet.
Basqarý úderisterin avtomattandyrý basqarý qyzmetiniń tsıklyn qysqartýǵa baǵyttalǵan. Ol jaýyngerlik mindetti alýdan bastap, onyń oryndalýyn taldaýǵa deıingi jumysty qamtıdy.
Máselen, avtomattandyrylǵan basqarý júıesi Áýe qorǵanysy kúshterinde jumys isteıdi. Ol áýe jaǵdaıyn beıneleýdi qol kúshiniń kómegimen emes, avtomatty túrde oryndaıdy. Jaýyngerlik quraldardyń daıyndyǵyn baqylaý, shtýrmandyq mindetterdi maqsatty bólý jáne sheshý baǵdarlamalyq-apparattyq keshenderdi qoldana otyryp júzege asyrylady.
Áýe qorǵanys kúshteri avtomattandyrylǵan basqarý júıesiniń mobıldi keshenderin jaýyngerlik is-qımyl kezinde bólimder men bólimshelerdiń manevr jasaýyn qamtamasyz etý úshin engizý josparlanyp otyr. Maıdandyq, armııalyq, sondaı-aq kólik avıatsııasyn basqarý múmkindigin qosý maqsatynda arnaıy baǵdarlamany qamtamasyz etýdiń fýnktsıonaly keńeıtiletin bolady.
Sondaı-aq, joǵarǵy býyn men qurlyq áskerin basqarýdyń avtomattandyrylǵan júıesi ázirlendi. Ol - Qarýly Kúshterdi basqarýdyń avtomattandyrylǵan júıesiniń negizi jáne baǵynyshty áskerlerdi basqarýdyń tıimdiligi men sapasyn arttyrýǵa, sheshimder qabyldaý ýaqytyn qysqartýǵa jáne kúsh-quraldardyń az shyǵynynda jaýyngerlik is-qımylda tabysqa jetý úshin áskerlerdiń múmkindikterin utymdy paıdalaný úshin jaǵdaı jasaýǵa arnalǵan.
Budan basqa, Qarýly Kúshter resýrstaryn basqarýdyń avtomattandyrylǵan júıesi ázirlenýde. Ol jumyldyrý, materıaldyq-tehnıkalyq, jáne ózge de resýrstardy , sondaı-aq áskerdiń kadrlyq áleýetin basqarý jáne býhgalterlik esepke alý protsesterin avtomattandyrýdy kózdeıdi. Atalmysh júıeni qurý aıaqtalǵannan keıin eseptiń barlyq túrlerin onlaın-rejımge kóshirý, sondaı-aq qolda bar jáne qurylatyn anyqtamalyqtar men jikteýishter negizinde Qarýly Kúshterdiń eseptik-jabdyqtaý birlikterin qalyptastyrý protsesin avtomattandyrý josparlanýda.
Sonymen qatar, «Áskerı basqarmanyń jergilikti tsıfrlyq organy» pılottyq jobasyn Nur-Sultan qalasy men Almaty oblysynyń jergilikti áskerı basqarma organdaryna engizý josparlanýda.
Qazirgi tańda ónerkásiptik paıdalanýǵa 11 aqparattyq júıe qabyldandy.
Strategııalyq, jedel jáne taktıkalyq deńgeıdiń dalalyq basqarý organdaryn avtomattandyrý deńgeıin arttyrý úshin 2020 jyly mobıldi oryndaýdaǵy avtomattandyrý quraldarynyń jeti dalalyq keshenin jáne jyljymaly nemese keıstik oryndaýdaǵy tórteýin alý josparlanyp otyr.
Qorǵanys Mınıstrligi, Bas shtab, Qarýly Kúshter túrleri, ásker tekteri, óńirlik qolbasshylyqtar, quramalar, áskerı bólimder men mekemeler arasynda aqparat almasý úshin derekterdi berýdiń vedomstvolyq jelisin qurý jalǵasýda. Bul áskerı bólimder men mekemelerdi biryńǵaı tsıfrlyq aqparattyq keńistikke biriktirýge múmkindik beredi.
