Tsıfrlandyrý arqyly salyqtyq túsimder ulǵaıtylady - Baqyt Sultanov
«2017 jyldyń aldyn ala qorytyndysy boıynsha ekonomıkanyń ósý qarqyny 4 paıyzdy qurady. Buǵan «Nurly jol», ındýstrııalyq-ınnovatsııalyq damytý memlekettik baǵdarlamalary aıasynda ındýstrııalyq-ınnovatsııalyq jáne ınfraqurylymdyq jobalardy iske asyrý óz áserin tıgizdi. Respýblıkalyq bıýdjet qarjy jyly ishinde eki ret naqtylanyp, osyndaı ekonomıkalyq jaǵdaıda atqaryldy. Bıýdjettiń negizgi parametrlerine kelsek, túsimder 101,1 paıyzǵa oryndalyp, 9 trln 799 mlrd teńgeni qurady. Shyǵystar 11 trln 156 mlrd teńgege atqarylyp, 99,8 paıyzǵa ıgerildi», - dedi Baqyt Sultanov.
Sonymen qatar ol bıýdjet tapshylyǵy 1 357 mlrd teńge kóleminde qalyptasqanyn eske salyp ótti. Bul jospardaǵy kórsetkishten 129 mlrd teńgege tómen. Onyń mólsheri Jalpy ishki ónimge shaqqanda jospardaǵy 3 paıyzdyń ornyna 2,6 paıyzdy qurady.
Budan bólek ol salyq-keden salasyndaǵy ákimshilendirýdi jetildirý úshin tıisti sharalar qabyldanǵanyn atap ótti. «2017 jyly Jalpy ishki ónimge shaqqandaǵy shoǵyrlanǵan bıýdjettiń salyqtarynyń JІÓ-degi úlesi - 16,8% qurady, onyń ishinde respýblıkalyq salyqtardyń úlesi 9,3 paıyz», - dedi mınıstr.
«Memlekettik kirister organdarynyń tekserýler sany 45 paıyzǵa qysqartyldy. Nysandarǵa shyqpaı-aq kameralyq baqylaýdyń habarlamalary boıynsha salyq tóleýshilerdiń ózderi 171 mlrd teńge eseptedi. Bul 2016 jylmen salystyrǵanda 19 paıyzǵa kóp (144 mlrd teńge). Salyqtardy eseptep alýdyń tıimdiligi artty. Habarlamalar boıynsha 123 mlrd teńge óndirildi, ıaǵnı 2016 jylǵa qaraǵanda 34 paıyzǵa artyq. Osy aıtylǵan málimetter bizdiń qabyldaǵan jospardyń aralyq nátıjeleri. Aldymyzda turǵan basty maqsattyń biri - salyqtyq-kedendik ákimshilendirýdi tsıfrlandyrý arqyly salyqtardyń ósý qarqynyn ulǵaıtý. Aǵymdaǵy jyly salyqtardyń JІÓ shaqqandaǵy kólemin 17 paıyzǵa jetkizemiz», - dedi Baqyt Sultanov.
