Tsıfrlandyrý arqasynda emhanalardaǵy kezek 2 esege qysqardy – vıtse-mınıstr

NUR-SULTAN. QazAqparat – Salany tsıfrlandyrý arqyly emhanalardaǵy kezek 2 esege qysqardy. Bul týraly QR Densaýlyq saqtaý birinshi vıtse-mınıstri Marat Shoranov Shanhaı Yntymaqtastyq Uıymyna múshe memleketteri Densaýlyq saqtaý mınıstrleriniń besinshi keńesinde aıtty, dep habarlaıdy QazAqparat vedomstvo saıtyna silteme jasap.

Marat Shoranov forým qatysýshylaryn eldegi joǵary tehnologııalyq medıtsınalyq kómektiń damýy týraly habardar etti. Ol Qazaqstan «Deni saý ult» jobasyn iske asyra otyryp, medıtsınalyq kómektiń qoljetimdiligi men sapasyna erekshe nazar aýdaratynyn atap ótti. Sondaı-aq, densaýlyq saqtaý uıymdaryn qajetti IT ınfraqurylymmen qamtamasyz etý týraly aıtty.

«Tsıfrlyq densaýlyq saqtaýǵa kóshýdiń arqasynda memlekettik densaýlyq saqtaý uıymdarynyń medıtsınalyq qujattamany qaǵazsyz júrgizýmen qamtylýy 100% deńgeıge jetti, emhanalardaǵy kezek 2 esege qysqardy», - dedi Marat Shoranov.

Eske salsaq, Qazaqstanda densaýlyq saqtaý tehnologııalaryn baǵalaıtyn mamandar daıyndaý isi qolǵa alyndy.