Chývashııada mıkroavtobýs jol apatyna ushyrap, 13 adam qaza boldy
RESEI. QazAqparat - Chývashııa Respýblıkasynda avtobýs pen júk kóligi soqtyǵysyp, oqıǵa saldarynan qurban bolǵandar sany 13 adamǵa jetti. Bul týraly TASS agenttigi habarlaıdy.
Agenttik tartqan málimetterge qaraǵanda, qurban bolǵandar týraly málimetterdi medıtsına uıymdaryndaǵy derekkóz taratqan.
«Jalpy mert bolǵandar sany 13 adam»,-dedi ol.
Derekkózdiń málimetterinshe, aýrýhanaǵa 7 adam jetkizilgen, olardyń 4-ýiniń jaǵdaıy aýyr. Taǵy bireýiniń densaýlyq jaǵdaıy ortasha. Taǵy ekeýi jeńil jaraqat alǵan. Mıkroavtobýstyń bir jolaýshysy men júk kóliginiń júrgizýshisine ambýlatorııalyq kómek kórsetildi.
Tótenshe jaǵdaılar mınıstrliginiń derekteri boıynsha, zardap shekkender sany 10 adam. Úsh adamnyń jaǵdaıy múshkil. Olar Cheboksary qalasynyń aýrýhanasyna jetkizilgen.
Reseıdiń jol tártibin qadaǵalaý organdarynyń baspasóz qyzmeti mıkroavtobýs pen júk kóligi júrgizýshileriniń aman ekendigin aıtty.
Memlekettik avtoınspektsııa oqıǵa ornyna óziniń qyzmetkerlerin jibergen.
Resmı málimetter boıynsha, kólik apaty M-7 trassasynyń 647-shi shaqyrymynda bolǵan. Sondaı-aq jol apatynan zardap shekkenderdiń barlyǵy kólikterden shyǵarylǵandyǵy aıtylady.
Foto: Nıkıta Vasılev/TASS
