Chýntsınnen Almatyǵa alǵash ret tikeleı áýe reısi ashyldy
ASTANA. KAZINFORM – Búgin Chýntsınnen Almatyǵa alǵash ret tikeleı áýe reısi iske qosyldy. Bul – Qytaıdyń eń iri megapolısin Ortalyq Azııamen baılanystyratyn turaqty áýe baǵyty, dep habarlaıdy Kazinform agenttiginiń Beıjińdegi menshikti tilshisi.
Chýntsın qalasynda «Almaty – Chýntsın – Almaty» baǵyty boıynsha halyqaralyq reıstiń resmı ashylý saltanaty ótti. Jańa baǵyt FlyArystan áýe kompanııasynyń Úrimji, Qulja (Inın) jáne Sıan qalalaryna qatynaıtyn reısterin tolyqtyrdy.
Saltanatty sharada FlyArystan áýe kompanııasynyń prezıdenti Iohan Eıdhagen jańa baǵyttyń ashylýy Qazaqstan men Qytaı arasyndaǵy baılanystardy nyǵaıtýdaǵy mańyzdy qadam ekenin atap ótti.
– Búgingi reıs – Chýntsın men Qazaqstan arasyndaǵy jańa áýe qatynasynyń bastaýy ǵana emes, eki eldiń halqyn, bıznesi men mádenıetin jaqyndastyratyn mańyzdy kópir. Bul baǵyt Batys Qytaı men Ortalyq Azııa arasyndaǵy yntymaqtastyqty keńeıtýge jańa jol ashady, – dedi áýe kompanııasynyń basshysy.
Onyń aıtýynsha, jańa reıs Chýntsın men Batys Qytaıdyń ózge óńirlerinen keletin saıahatshylarǵa Almaty men Qazaqstanǵa tikeleı barýǵa múmkindik beredi. Sonymen qatar qazaqstandyqtar Chýntsınge jáne Batys Qytaıdyń basqa qalalaryna qolaıly jolmen jete alady.
Reısterdiń oryndalý tártibi týraly FlyArystan kompanııasynyń kommertsııalyq baǵyty boıynsha vıtse-prezıdenti Matteo Chekkonı aıtyp berdi.
– Chýntsın – Almaty baǵyty boıynsha reıster aptasyna eki ret qatynaıdy. Syıymdylyǵy 180-188 jolaýshy bolatyn Airbus A320ceo jáne Airbus A320neo ushaqtary paıdalanylady. Chýntsınnen ushaqtar beısenbi jáne jeksenbi kúnderi tańerteń, Almatydan sársenbi jáne senbi kúnderi keshke attanady. Mundaı keste iskerlik saparlarǵa, demalysqa jáne qysqa merzimdi saparlarǵa qolaıly, – dedi ol.
Qazaqstandyq áýe kompanııasynyń ókili qysqy maýsymda marshrýttar jelisin odan ári keńeıtý jospary týraly aıtty.
– Aldaǵy qysqy maýsymnan bastap Qytaıdaǵy jumysymyzdy odan ári keńeıtip, Astana men Úrimji arasynda jańa tikeleı reıs ashamyz. Bul baǵyt Qazaqstan astanasy men Shyńjań arasyndaǵy áýe qatynasyn jaqsartady, – dep qorytyndylady spıker.
Almaty men Chýntsın arasyndaǵy áýe reısiniń uzaqtyǵy shamamen 5 saǵat.
Buǵan deıin qazaqstandyqtarǵa Qytaıǵa kirýdiń jańa tártibi týraly eskertilgenin habarlaǵan edik.
