«Chýkotka» baryndaǵy tóbeles: Sot Kýznetsovty kolonııaǵa qaıtardy
ALMATY. QazAqparat - Almaty oblystyq sotynyń apellıatsııalyq kollegııasy adam óltirgeni úshin isti bolǵan Kýznetsovty kolonııaǵa qaıtarý jóninde sheshim shyǵardy, dep habarlaıdy QazAqparat.
Bul týraly Almaty oblystyq sotynyń baspasóz hatshysy Aıda Sadyqova aıtty. Almaty oblystyq sotynyń apellıatsııalyq kollegııasy qaza bolǵan Syrym Muratqalıevtyń aǵasy Dáýlet Muratqalıevtiń aryzyn qaraǵan bolatyn. Jábirlenýshi Qapshaǵaı sotynyń Aleksandr Kýznetsovtyń ótelmegen merzimin 1 mln teńge aıyppulǵa aýystyrý týraly úkimin qaıta qaraýdy talap etken edi. Kóz jumǵan Syrym Muratqalıevtiń aǵasy Dáýlet Muratqalıevtiń aıtýynsha, sot protsesi jábirlenýshi taraptyń kelisiminsiz ótken. Jábirlenýshiniń qorǵaýshysy Raýshan Bısenova Qapshaǵaı sotynyń birqatar zańbuzýshylyq jibergenin dáleldeýge tyrysty. Sýdıa Qanat Jantasov taraptardy tyńdaı kele Qapshaǵaı qalalyq sotynyń úkimin jaramsyz etip, Aleksandr Kýznetsovty kolonııaǵa qaıtarý týraly sheshim shyǵardy.
Esterińizge sala keteıik, 2015 jyly «Chýkotka» barynyń aldyndaǵy tóbeles kezinde Syrym Muratqalıev kóz jumǵan bolatyn. Sol jyldyń maýsymynda birinshi ınstantsııa soty Kýznetsovty abaısyzda adam óltirip alǵany úshin 1,5 jylǵa bas bostandyǵynan aıyrǵan bolatyn. Keıinirek, Almaty qalalyq sotynyń apellıatsııalyq kollegııasy «Adam densaýlyǵyna qasaqana nuqsan keltirý arqyly adam ólimine ákep soqtyrý» babymen 8 jylǵa bas bostandyǵynan aıyrdy. Kýznetsov jazasyn Almaty túbindegi Zarechnyı aýylyndaǵy túrmede ótep jatqan edi.
