«Chýkotka» baryndaǵy tóbeles: Marqumnyń aǵasy Kýznetsovtyń jazasyn aýystyrýǵa qarsy
ALMATY. QazAqparat - «Chýkotka» barynyń aldyndaǵy tóbeles kezinde qaıtys bolǵan marqumnyń aǵasy Kýznetsovtyń jazasyn aýystyrýǵa qarsylyq bildirdi, dep habarlaıdy QazAqparat tilshisi Almaty oblystyq sotyna silteme jasap.
Munyń aldynda Qapshaǵaı qalalyq soty Aleksandr Kýznetsovtyń ótelmegen merzimin 1 mln teńge aıyppulǵa aýystyrý týraly sheshim qabyldaǵan bolatyn.
Qaıtys bolǵan Syrym Muratqalıevtiń aǵasy Dáýlet Muratqalıevtiń aıtýynsha, sot protsesi jábirlenýshi taraptyń kelisiminsiz ótken.
«Jábirlenýshi taraptyń sotqa shaqyrylmaýyna jáne sot protsesine qatyspaýyna baılanysty sot aktisine shaǵym túsirý úshin 15 kúnde qaıta qalpyna keltirýge sheshim qabyldady», - dedi Almaty oblystyq sotynan.
Osy sheshimnen soń Dáýlet Muratqalıev Almaty oblystyq sotyna jeke aryz túsirdi. Aryzynda ol Kýznetsovtyń jazasyn óteý merzimin aıyppulǵa aýystyrý týraly sheshimin qaıta qaraýǵa ótinish bildirdi.
Esterińizge sala keteıik, 2015 jyly «Chýkotka» barynyń aldyndaǵy tóbelestiń kesirinen Syrym Muratqalıev kóz jumǵan bolatyn. Sol jyldyń maýsymynda birinshi ınstantsııa soty Kýznetsovty abaısyzda adam óltirip alǵany úshin 1,5 jylǵa bas bostandyǵynan aıyrǵan bolatyn.
Keıinirek, Almaty qalalyq sotynyń apellıatsııalyq kollegııasy «Adam densaýlyǵyna qasaqana nuqsan keltirý arqyly adam ólimine ákep soqtyrý» babymen 8 jylǵa bas bostandyǵynan aıyrǵan bolatyn. Kýznetsov jazasyn Almaty túbindegi Zarechnyı aýylynda ótep jatqan edi.
