«Chýkotka» baryndaǵy tóbeles: Kýznetsovtyń qaıda ketkeninen jaqyndary habarsyz
ALMATY. QazAqparat - Aleksandr Kýznetsovtyń qaıda ketkeninen jaqyndary habarsyz. Bul týraly QazAqparat tilshisine qorǵaýshy Alma Mýsına aıtty.
«Men ázirge onyń qaıda ekenin bilmeımin. Jaqyndary da bilmeıdi. Sondyqtan, biz ony elden ketti dep aıta almaımyz», - dedi Almas Mýsına.
Qorǵaýshynyń aıtýynsha, endi Kýznetsovtyń isin Qazaqstanda belgili bir quqyq qorǵaý uıymy óz baqylaýyna alǵan.
«Maǵan jetken aqparatqa sáıkes, sol uıym Kýznetsovtyń isin baqylaıtyn bolady. Onyń elden ketkeni, taraptardyń áreketi, Kýznetsovqa qandaı jaza qoldanylýy múmkindigi baqylaýda bolady. Olar iske aralaspaıdy. Biraq baqylaıtyn bolady. Munyń naqtysyn búgin túste Kýznetsovtyń dostarymen kezdesýde anyqtaıtyn bolamyn. Qandaı uıym ekeni maǵan belgisiz», - dedi Almas Mýsına.
Aıta ketý kerek, jaqynda birqatar BAQ-ta Aleksandr Kýznetsovtyń elden qashyp ketkeni jarııalanǵan bolatyn.
15 tamyzda 16:00-de Taldyqorǵan qalasynda Almaty oblystyq soty óz qaýlysynyń tolyq mátinin oqýy tıis edi.
Almaty oblystyq sotynyń apellıatsııalyq alqa sýdıasy Qanat Jantasov taraptardy tyńdaı kele, Qapshaǵaı qalalyq sotynyń úkimin jaramsyz etip, Aleksandr Kýznetsovty kolonııaǵa qaıtarý týraly sheshim shyǵarǵan bolatyn.
Esterińizge sala keteıik, 2015 jyly «Chýkotka» barynyń aldyndaǵy tóbeles kezinde Syrym Muratqalıev kóz jumdy. Sol jyldyń maýsymynda birinshi ınstantsııa soty Kýznetsovty abaısyzda adam óltirip alǵany úshin 1,5 jylǵa bas bostandyǵynan aıyrǵan edi. Keıinirek, Almaty qalalyq sotynyń apellıatsııalyq alqasy «Adam densaýlyǵyna qasaqana nuqsan keltirý arqyly adam ólimine ákep soqtyrý» babymen 8 jylǵa bas bostandyǵynan aıyrdy. Kýznetsov jazasyn Almaty túbindegi Zarechnyı aýylyndaǵy túrmede ótep jatqan.
