«Chýkotka» baryndaǵy tóbeles: Kýznetsov túrmeden shyqty
ALMATY. QazAqparat - «Chýkotka» baryndaǵy tóbeles úshin sottalǵan Aleksandr Kýznetsov túrmeden bosap shyqty. Sot onyń ótelmegen 5 jylyn aıyppulmen jabý týraly sheshim qabyldady, dep habarlaıdy QazAqparat tilshisi oblystyq sottyń baspasóz qyzmetine silteme jasap.
Qapshaǵaı qalalyq soty sottalýshynyń jazasyn óteý merziminiń jartysyn jeńil jazamen almastyrýdy qanaǵattandyrdy.
«Kýznetsov Aleksandr Mıhaılovıchtiń 5 jyl jazasyn óteý merzimi QR QK 73-babynyń 3-bólimine sáıkes jazasyn óteý ornyndaǵy 4 kúnine 1 AEK mólsherinde aıyppulmen, ıaǵnı 1 097 281 teńgemen óteýge aýystyryldy», - delingen sot qaýlysynda.
Esterińizge sala keteıik, 2015 jyly «Chýkotka» barynyń aldyndaǵy tóbelestiń kesirinen Syrym Muratqalıev kóz jumǵan bolatyn.
Sol jyldyń maýsymynda birinshi ınstantsııa soty Kýznetsovty abaısyzda adam óltirip alǵany úshin 1,5 jylǵa bas bostandyǵynan aıyrǵan bolatyn.
Keıinirek, Almaty qalalyq sotynyń apellıatsııalyq kollegııasy «Adam densaýlyǵyna qasaqana nuqsan keltirý arqyly adam ólimine ákep soqtyrý» babymen 8 jylǵa bas bostandyǵynan aıyrǵan bolatyn. Kýznetsov jazasyn Almaty túbindegi Zarechnyı aýylynda ótep jatqan edi.
Almaty oblystyq sotynyń apellıatsııalyq kollegııasy adam óltirgeni úshin isti bolǵan Kýznetsovty kolonııaǵa qaıtarý jóninde sheshim shyǵardy.
Sot úkimi shyǵatyn kúni Aleksandr Kýznetsovtyń Qazaqstan aýmaǵynan ketip qalǵany belgili boldy.
2018 jylǵy 15 qazanda Bostandyq aýdandyq sotynda «Chýkotka» baryndaǵy tóbeleste adam óltirgeni úshin sottalǵan Aleksandr Kýznetsovqa izdeý jarııalandy.
