«Chýkotka» baryndaǵy tóbeles: Advokat Kýznetsovpen baılanysa almaı jatyr
ALMATY. QazAqparat - Almatyda qorǵaýshy Alma Mýsına Aleksandr Kýznetsovpen baılanysa almaı otyr, dep habarlaıdy QazAqparat tilshisi.
«Ol elden ketip qaldy ma joq pa? Men ony naqty aıta almaımyn. Kesheden beri telefonyna habarlasa almaı jatyrmyn. Telefony óshirýli. Búgin 15:00-de úkim oqylatyn edi. Elden ketip qaldy dep aıtýǵa áli erte. Maǵan onyń anasy habarlasýy kerek. Eger ýchaskelik ınspektor úıine barǵanda Kýznetsov joq bolyp shyqsa, oǵan izdeý jarııalanýy múmkin. Men úshin onyń úıde bolǵany jaqsy edi. Sebebi, jarty jyldan soń taǵy da ótinish berýge bolatyn edi», - dedi Alma Mýsına.
Aıta ketý kerek, búgin birqatar BAQ-ta Aleksandr Kýznetsovtyń elden qashyp ketkeni jarııalanǵan bolatyn.
Búgin 16:00-de Taldyqorǵan qalasynda Almaty oblystyq soty óz qaýlysynyń tolyq mátinin oqıtyn edi.
Keshe Almaty oblystyq sotynyń apellıatsııalyq kollegııasynyń sýdıasy Qanat Jantasov taraptardy tyńdaı kele Qapshaǵaı qalalyq sotynyń úkimin jaramsyz etip, Aleksandr Kýznetsovty kolonııaǵa qaıtarý týraly sheshim shyǵarǵan bolatyn.
Esterińizge sala keteıik, 2015 jyly «Chýkotka» barynyń aldyndaǵy tóbeles kezinde Syrym Muratqalıev kóz jumdy. Sol jyldyń maýsymynda birinshi ınstantsııa soty Kýznetsovty abaısyzda adam óltirip alǵany úshin 1,5 jylǵa bas bostandyǵynan aıyrǵan bolatyn. Keıinirek, Almaty qalalyq sotynyń apellıatsııalyq kollegııasy «Adam densaýlyǵyna qasaqana nuqsan keltirý arqyly adam ólimine ákep soqtyrý» babymen 8 jylǵa bas bostandyǵynan aıyrdy. Kýznetsov jazasyn Almaty túbindegi Zarechnyı aýylyndaǵy túrmede ótep jatqan edi.
