«Chýkotka» barynda kisi óltirdi dep aıyptalǵan Aleksandr Kýznetsov Túrkııaǵa ushyp ketken

Sotta polıtsııa ókili habarlaǵandaı, 22 tamyzda Bostandyq aýdandyq ІІB-ne Almaty oblysy sotynyń qaýlysy tústi. Onda Kýznetsovtyń jazasyn aıyppulmen aýystyrý týraly sheshimdi buzý qajettigi týraly aıtylǵan.

Tártip saqshylary Kýznetsovty taýyp, kolonııaǵa qaıtarýy tıis bolatyn. Biraq olar sottalýshyny úıinen taba almady.
Kýznetsovtyń kórshileriniń aıtýynsha, ol úıinde bolmaǵan. Keıin belgili bolǵandaı, Kýznetsov 13-tamyzda Qazaqstan shekarasynan shyǵyp ketken. Turkish airlines reısimen Almaty-Stambýl baǵytynda shyǵyp, qaıtyp oralmaǵan.

Sottalýshynyń qorǵaýshysy Alma Mýsınanyń aıtýynsha, is materıaldarynda Kýznetsovtyń anasynyń jazbasha suraq jaýaby engizilmegen. Sonymen qatar, úıine barǵan polıtsııanyń raporty bar. Qujatta 7-tamyz dep kórsetilgen. Alaıda, apellıatsııalyq sot sheshimi 14-tamyzda shyqqan.

Sot isti qaraýdy keıinge qaldyryp, keler otyrysta onyń anasynan jaýap alý qajet dep sheshken.

Esterińizge sala keteıik, 2015 jyly «Chýkotka» barynyń aldyndaǵy tóbeles kezinde Syrym Muratqalıev kóz jumǵan bolatyn. Sol jyldyń maýsymynda birinshi sot ınstantsııasy Kýznetsovty abaısyzda adam óltirip alǵany úshin 1,5 jylǵa bas bostandyǵynan aıyrǵan bolatyn. Keıinirek, Almaty qalalyq sotynyń apellıatsııalyq alqasy «Sońy adam ólimine alyp kelgen adam densaýlyǵyna qasaqana nuqsan keltirý» babymen 8 jylǵa bas bostandyǵynan aıyrdy. Kýznetsov jazasyn Almaty túbindegi Zarechnyı aýylyndaǵy túrmede ótep jatqan edi.

2018 jyldyń 2-shildesinde Aleksandr Kýznetsov túrmeden bosap shyqty. Sot onyń ótelmegen 5 jylyn aıyppulmen jabý týraly sheshim qabyldady.

Keıin Almaty oblystyq sotynyń apellıatsııalyq alqasy adam óltirgeni úshin isti bolǵan Kýznetsovty kolonııaǵa qaıtarý jóninde sheshim shyǵardy.

Sot úkimi shyǵatyn kúni Aleksandr Kýznetsovtyń Qazaqstannan ketip qalǵany belgili boldy.