«Chrysler» jol apatynda balasynan aıyrylǵan otbasyna 150 mln. dollar tóleýge mindetti boldy
ASTANA. QazAqparat - AQSh-tyń Djordjııa shtatynyń soty «Chrysler» kompanııasyn jol apatynda qaza tapqan 4 jasar balanyń áke-sheshesine 150 mıllıon dollar kóleminde ótemaqy tóleýge mindettedi, dep habarlady «RIA NOVOSTI».
Jol apaty 2012 jyly bolǵan, onda Remıngton Ýolden esimdi 4 jasar bala qaza tapty. Onda Jeep Grand Cherokee kóligi pıkapqa soǵylyp, órtenip ketken. Órttiń tez tutanýyna avtomobıldiń zaýyttan jibergen qateligi sebep bolǵan.
Sotta alqabıler jol apatynda júrgizýshiniń kinási bir-aq paıyz, kóliktiń tez órtenýine kompanııa 99 paıyz kináli dep tapqan.
2013 jyly Chrysler kompanııasy AQSh prokýratýrasynyń qysymymen atalǵan kóliktiń 1,56 mıllıon danasyn zaýytqa qaıtarýǵa májbúr boldy. Sebebi, avtomobıldiń benzın baktary soqqyǵa tótep beretin zatpen qorǵalmaǵan. Sol sebepti kólik tez órtenedi, deıdi mamandar.
Chrysler FCA US kompanııasynyń ókili sot úkimine kelispeı, appelıatsııalyq shaǵym keltiretinin málimdedi.
