Chrysler otaldyrý júıesindegi aqaýǵa baılanysty 800 myńǵa jýyq Jeep-ti keri qaıtaryp alady
ASTANA. QazAqparat - Amerıkalyq avtokontsern «Chrysler Group» 792 300 kólikti keri qaıtarady. Naqtyraq aıtqanda, «Jeep» markaly avtokólikterinen aqaý shyqqan. Atalǵan kompanııada mundaı oqıǵa bıyl osymen úshinshi ret qaıtalanyp otyr, dep habarlady RBK.
Bul joly 2006-2007 jyly shyqqan «Jeep Commander» men 2005-2007 jylǵy «Jeep Grand Cherokee» modelindegi kólikter zaýytqa keri qaıtarylady. Onyń negizgi sebebi, kólikti otaldyrý júıesinde. Kompanııa basshylarynyń aıtýynsha, bul kemshiliktiń kesirinen kólik júrip kele jatyp óship qalýy múmkin. Tekserý nátıjesi boıynsha, dál osy kemshilikten iri jol kólik apaty bolmaǵan.
Bir kólik apaty bolǵan, odan zardap shekkender joq. Avtokontsern keri shaqyrtqan barlyq kólikterge tegin qyzmet kórsetedi.
