Chınshanlo eki dúrkin olımpıada chempıony bolýǵa ázirlik ústinde - Alekseı Nı
ASTANA. QazAqparat - Ziltemirshi Zýlfııa Chınshanlo eki dúrkin olımpıada chempıony bolýǵa ázirlenýde. Londondaǵy Olımpıada oıyndary jeńimpazynyń alǵa qoıǵan mindeti jaıly Vesti.kz-ke bergen suhbatynda Qazaqstan quramasynyń bas bapkeri Alekseı Nı aıtyp berdi.
- Alekseı Gennadevıch, quramany úshke bólý ne úshin qajet boldy?
- Osy maýsymda birinshi jıyn qalpyna keltirý bolyp tabylady. Men bárine tańdaý quqyǵyn berdim. Komandanyń ár múshesi ony qaıda, qalaı ótkizem dese ózi biledi. Dástúrli túrde jyldy Tekelide qańtarda bastadyq. Alaıda bıyl Sochıdegi reseılik bazaǵa qoljetimdilik aldyq. Barǵysy kelgender bizben birge bardy.
- Uzaq ýaqyt kórinbeı ketken Zýlfııa Chınshanlony kórsettińiz. Ol týraly qandaı jańalyqpen bólisesiz?
- Chınshanlo o bastan Rıodaǵy Olımpıadaǵa óz jeke josparymen ázirlik ústinde. Ol Brazılııada ǵana tolyq daıyn bolady. Oǵan deıin ol Taldyqorǵanda ótetin Qazaqstan chempıonatyna qatysady. Qazir ol eki dúrkin olımpıada chempıony ataný úshin daıyndalyp jatyr.
- Sońǵy suraǵym - Olımpıada-2016-ǵa daıyndyqtyń kelesi qadamy qalaı jalǵaspaq?
- Sochıden keıin komanda bóligi 15 aqpanda Qytaıǵa ushady, qalǵan bóligi Eýropada qalady. Al úshinshi bóligi Tekelide jattyǵady. Komandanyń jaǵdaılary jaqsy. Kóńil kúıleri óte joǵary deńgeıde. Olımpıadalyq oıyndarǵa jarty-aq jyl qaldy...
Eske salsaq, aýyr atletıka boıynsha Qazaqstannyń ulttyq quramasy osy jyly alǵash ret Sochıde 10 aqpanǵa deıin jalǵasatyn oqý-jattyǵý jıynyna kiristi. Komandanyń taǵy bir bóligi Varshavada. Qalǵan shtangyshylar Qazaqstanda daıyndalýda.
