ChinaNews: Toqaev Qytaıǵa ál-Farabı músinin nelikten syıǵa tartty
Qytaıdyń memlekettik buqaralyq aqparat quraly – ChinaNews Qazaqstan Prezıdenti Qasym-Jomart Toqaevtyń Beıjiń Til jáne Mádenıet ýnıversıtetine sapary men Qazaqstan atynan ýnıversıtetke ál-Farabı músinin tartý etkeni týraly maqala jarııalady, dep habarlaıdy Kazinform.
Maqalada ál-Farabıdiń ómir joly jan-jaqty tanystyrylyp, ǵulamanyń Qazaqstanda týyp-óskeni, ıslam fılosofııasyn týdyrǵany, adamzattyń Arıstotelden keıingi «ekinshi ustazy» retinde dúnıe júzi maqtaǵan ataqty oıshyl ekendigine toqtalady. Sondaı-aq, Shyǵys pen Batys toǵysqan Ortalyq Azııada ómir súrgeni, sondyqtan onyń oılary elder mádenıetteriniń mánin joǵary deńgeıde biriktiretini jáne túrli eńbekterinde de kórinis tapqany atap kórsetilgen.
«Ál-Farabı – Shyǵys pen Batys órkenıetteri arasyndaǵy ózara bilim men yqpal etýdiń tıptik úlgisi, onyń qazaqtardyń júreginde óte joǵary mártebege ıe ekeni daýsyz, - dep jazdy ChinaNews. - Sondyqtan, Toqaev Qazaqstannyń tarıhy men mádenıetine erekshe mán berýdi kózdep, ál-Farabı músinin Qytaıǵa berýdi jón kórdi. Qazaqstannyń syrtqy álemmen, sonyń ishinde Qytaımen tyǵyz mádenı baılanysy bar ekenin jáne basqa órkenıetterden úırenýge daıyn ekenin bildirgisi keledi».
Sondaı-aq maqalada Qazaqstan syıǵa tartqan ál-Farabı músininiń qarsysynda Qytaı oıshyly Konfýtsııdiń músini turǵany aıtylǵan. Ál-Farabı músini ashylǵan kúni Beıjiń Til jáne Mádenıet ýnıversıtetinde «Qazaqstandy zertteý ortalyǵy» da resmı túrde quryldy. Mekeme mindeti - Qazaqstannyń tarıhy, mádenıeti, bilimi, saıasaty jáne basqa da aspektileri boıynsha zertteýler júrgizý jáne Qytaı men Qazaqstan arasyndaǵy dostyq yntymaqtastyqty ilgeriletý.
«Bul tarıh pen keńistiktegi adamzat órkenıetteri arasyndaǵy dıalogti bildirip qana qoımaı, Qytaı men Qazaqstan arasyndaǵy máńgilik dostyqtyń sımvolyna aınalady», - dep jazdy ChinaNews.
Sondaı-aq maqalada Toqaevtyń bir kezderi Beıjiń til jáne mádenıet ýnıversıtetinde oqyǵany, mektepke barǵan saparynda onyń burynǵy ustazymen de kezdesip, VIP kitabyna qytaısha jazý jazǵany týraly aıtylǵan. Bul «mádenı dıplomatııanyń» bir túri jáne Qytaı men Qazaqstan qarym-qatynasynyń jan-jaqty damýynyń, eki el arasyndaǵy tyǵyz mádenı almasýdyń kórinisi dep sanalatyny jazylǵan.
«Beıjińde ornatylǵan ál-Farabı músini Qytaı-Qazaqstan qarym-qatynasynyń altyn 30 jylynyń dańqymen jazylǵany sózsiz», - dep jazdy ChinaNews.
